Vijojnë deklaratat e familjarëve të Kostandinos Kaçifasit, i cili u vra të dielën që lamë pas nga forcat Renea në fshatin Bularat të Gjirokastrës.
Sipas policisë 35-vjeçari që i përkiste minoritetit grek qëlloi me breshëri ndaj forcave dhe në tokë u gjetën të paktën 44 fishekë që kishin dalë nga arma e tij.
Mirëpo ditën e sotme motra e tij Ermioni Kaçifas ka folur për televizionin grek Ant 1 ku ka thënë se i vëllai nuk kishte fare armë.
Sipas saj Kostandino nuk do t’i bënte keq askujt dhe policia shqiptare e vrau pasi ai ishte grek.
E motra e viktimës ka thënë:
Vëllai im nuk kishte armë. Ai ishte një objektiv, e ndiqnin për ditë e muaj. Ai nuk do të bënte asgjë. Kush dha urdhrin për të bërë këtë ekzekutim? Nuk mund të priste policia. Madje njëherë policia shkoi për kontroll në banesën e prindërve të mi në Bularat. Policia i kërkoi nënës të fliste shqip. “Çfarë është këtu, Greqi?” i tha.”
Motra e Kostandino Kaçifas foli edhe për ekspertizën e dytë që po i bëhet trupit të vëllait të saj, duke vonuar kështu ceremoninë mortore.
Kujtojmë se sipas deklaratës së policisë Kaçifas kishte një kallashnikov të modifikuar me një dylbi për të qëlluar me saktësi nga larg dhe ka video të bëra publike që tregojnë se ai lëviz me armë.