Gjatë një dalje për mediat, kryeministri Rama foli rreth vizitës së tij në Qarkun e Kukësit, por jo vetëm për të pasi pyetjet e gazetarëve ishin për fusha të ndryshme.
Teksa premtoi aeroport, stadium dhe infrastrukturë më të mirë, i befasishëm ishte premtimi i bërë në minutat e fundit nga Edi Rama.
Pyetjes së gazetarit lokal të Kukësit se “a do t’i jepni fonde bashkisë për rregullimin e qytetit?”, Rama iu përgjigj:
Për Kukësin kemi bërë shumë, nuk mund të themi se qytetarët duhet të kënaqen me kaq, sepse e mira nuk ka fund.
Por Bashkinë e Kukësit do ta fitojmë ne vitin që vjen dhe do të kemi një marrëdhënie dhe bashkëpunim më të mirë dhe më të frytshëm.”
Dhe po, Rama ishte i prerë në këtë përgjigje e cila dukej më shumë si e “vulosur” se sa si një “premtim” shpresues.
Gjithsesi, kryeministri u pyet edhe për lëvizjen e lirë Shqipëri-Kosovë, por nuk nënvizoi që doganat do të hiqen, thjesht do të ketë bashkim doganor.
Kryeministri Rama tha:
Së pari nuk flasim për Shqipëri Kosovë pa dogana, por për bashkim doganor. Nga ana jonë ne kemi qenë gati prej vitit të shkuar, qeveria e Kosovës nuk ishte gati dhe marrëveshja në rrafshin politik nuk ishte gati në rrafshin praktik. Por shumë shpejt do të vendosim për bashkimin doganor. Nuk do ketë dy palë kontrolle, dy palë doganierë dhe dy palë dhimbje koke, do jetë vetëm një doganë.
Ua kam thënë edhe miqve tanë europianë që nëse Serbia do bashkim doganor me ne, le të bëjë nuk na pengon gjë, por me Kosovën nuk na ndalon dot. Kjo do lehtësonte mjaft procedura në rrafshin e ecurisë ekonomike me vendet e Ballkanit. Siç lëvizin nëpër Europë me kufij fluidë pa pengesa, duam ta bëjmë edhe ne këtu të njëjtën gjë. Po të mbledhësh gjithë kohën e pritjes së mauneve, kamionëve dhe çdo lloj makine tjetër në doganat e Ballkanit i kalojnë 1000 vjet, vetëm gjatë një viti.”