Adriatik Llalla, është përmendur sërish për një tjetër vepër penale këto ditë nga burime jozyrtare në media, se pas daljes së fashikujve të hetimit nga dosja e prokurorisë për rastin “Dako” fshihet emri i tij.
Llalla, i cili po hetohet dhe për abuzimet që ka bërë në kohën kur ka drejtuar Inspektoratin e Deklarimit të Pasurisë dhe në veçanti Prokurorinë e Përgjithshme, duke vënë “dhjamë” dhe pasuri, ka kërkuar azil politik për veten dhe familjen në Bremen të Gjermanisë.
Kur bëmë të ditur lajmin se Llalla ishte nisur në ekzil, në përpjekje për t’i shpëtuar ndëshkimit ligjor në Shqipëri, me motivacionin se atij dhe familjes së tij i rrezikohej jeta për shkak të detyrës (nga një mesazh në telefonin e tij), të gjithë nisën të qeshnin, pasi nuk ka ngelur i madh e i vogël, që nuk e di se ish-prokurori ka “fjetur gjumë” në krye të organit të akuzës, bashkë me mikeshën e tij Rovena Gashi.
Ndërsa bashkëshortja dhe fëmijët e kryeprokurorit kanë qenë të “kërcënuar” nga një jetë luksi dhe shpenzime marramendëse të vëna në kohën kur kryeprokurori shiste dhe blinte drejtësinë si mall pazari.
Si argument shtesë, Adriatik Llalla për të përfituar azilin politik, ka treguar dhe sëmundjen e tij të epilepsisë, dhe për epikrizën kanë ndihmuar deklarimet e ish-prokurores Rovena Gashi (edhe kjo nën hetim), e cila në mungesë të familjes i ka ndenjur pranë në momentet e vështira, kur e kapnin krizat ish-kryeprokurorin.
Mësohet se organet ligjzbatuese gjermane, të cilat kanë marrë informacionin e nevojshëm nga partnerët në Tiranë, ia kanë refuzuar azilin ish-kryeprokurorit Llalla dhe zgjatjen e afateve të qëndrimit, sapo u njoftuan për jetën e “tmerrshme” mes apartamenteve, vilave dhe tokave të vëna rishtazi, makinat dhe udhëtimeve luksoze, njëherë me familjen e njëherë me Rovenën.
Arta Marku duhet t’i jap përgjigjen shqiptarëve dhe ndërkombëtarëve, me qëllim dërgimin para drejtësisë të gjithë shkelësve të ligjit, që janë pasuruar duke bërë pazare me drejtësinë e duke shitur jetë njerëzish: Adriatik Llalla rrezikohet nga disa mesazhe kërcënuese apo nga drejtësia që nuk po vjen?!/Ekskluzive.al