Report Tv siguron pamjet e plagosjes së dyfishtë në Selitë të Tiranës, dy ditë më parë, brenda ambienteve të një lokali, ku u konfliktuan dy grupe të rinjsh. Në pamjet duket momenti kur në lokalin e Florian Musait hyjnë disa të rinj.
Ata e takojnë Musain i cili ndodhej në shoqërinë e dy të njohurve të tij në një nga tavolinat. Ata që mbërrijnë, sipas grupit hetimor janë pjesë e grupit të 27-vjeçarit Gjon Pelivani. Në fillim duket si një takim sqarues mes palëve, por situata tensionohet menjëherë. Pamjet filmike kanë fiksuar të paktën tre persona me armë zjarri pistoletë në duar. Pas gjesteve kërcënuese në ambientet e lokalit, të rinjtë dalin jashtë për t’u sqaruar, pasi dyshojnë se vendi ku ata po debatonin po monitorohej nga kamerat e sigurisë dhe gjithçka mund të filmohej.
Pasi dalin jashtë, të rinjtë vijojnë të debatojnë dhe gjithçka ka përfunduar me përdorimin e armëve të zjarrit. Të shtënat me armë jashtë lokalit dhe momenti i plagosjeve të Gjon Pelivanit (i njohur ndryshe si Valmend Pelivani) dhe Renato Hoxhës, 31-vjeç, kamarier në lokalin ku ndodhi ngjarja – nuk janë fiksuar nga kamerat. Por policia bën të ditur se ka prova dhe pamje filmike ku tregohet se ka qenë Florian Musai ai i cili ka hapur zjarr i pari në drejtim të grupit që e kërcënonte./Shqiptarja.com