Tre punonjëse të një banke në Tiranë kanë mashtruar një qytetar duke i shkaktuar atij një dëm prej 300 mijë dollarësh dhe 410 milionë lekësh të vjetra.
Ardian Dauti ka shkuar në degën e një banke në Tiranë në datën 9 dhjetor të vitit të kaluar dhe ka dashur të depozitojë shumën totale prej 820 milionë lekësh të vjetra.
Tre punonjëset e akuzuar kanë kryer veprime fiktive në favor të biznesmenit Lefter Sulkaj, i cili zotëron shoqërinë Sulkaj.
Anila Bushi, Vilma Gode dhe Valbona Derhemi i kanë kaluar gjithë shumën e sipër përmendur biznesmenit në fjalë. Më pas në fund të ditës gjatë mbylljes së bilancit e kanë thirrur sërish Ardian Dautin për t’i kërkuar ndihmë për zgjidhjen e situatës.
Ato i kanë premtuar thotë prokuroria se shuma do t’i kthehej në kohë duke i paraqitur të dhëna të pavërteta se shtetasi Sulkaj kryente transaksione me shuma të mëdha financiare.
Siç shton Prokuroria punonjësja e Bankës ka prezantuar të dy klientët me njëri-tjetrin. Pas depozitimit të vleftave nga Dauti në llogarinë e Sulkaj ai nuk ka kryer asnjë tërheqje kesh të parave, çka sipas prokurorisë hedh dyshime se këto veprime janë kryer për të mbuluar transaksionin fiktiv.
Sipas prokurorisë “veprimet në bankë me qëllim mashtrimin janë të provuara”.
Tashmë tre punonjëset së bashku me bankën e tyre do të përfundojnë në gjykatë. Banka do të akuzohet pasi nuk ka vepruar për të zbuluar veprimet e punonjëseve që kanë shkelur manualin dhe si rrjedhojë nuk ka mekanizmat e duhur për mbrojtjen e klientit.
