Taulant Balla ka kallëzuar dje penalisht në prokurori kreun demokrat Lulzim Basha, ish-oficerin e policisë Emiljano Nuhu dhe gazetarin pranë PD, Basir Çollaku. Një ditë pas dëshmisë së ish-oficerit Emiljano Nuhu, se ishte kërcënuar me pistoletë në kokë në ambientet e policisë Krujë, në prani të Taulant Ballës dhe deputetit Rrahja në mënyrë që të mbyllte hetimet ndaj djalit të këtij të fundit, kreu i grupit parlamentar i PS ju drejtua organit të akuzës. Në padinë e depozituar në prokuroi, kreu i grupit parlamentar i PS, Taulant Balla akuzon kreun demokrat Lulzim Bashën për “Shpërdorim detyre” dhe “Kallëzim të rremë” në lidhje me një krim që dihet se nuk është kryer.
Balla e akuzon gjithashtu kreun demokrat për krijim dhe publikim të provave të rreme me qëllim fyerjen në publikë. Ndërsa me po të njëjtat akuza, kreu i grupit parlamentar i PS, ka akuzuar edhe ish-oficerin Emiljano Nuhu si dhe gazetarin pranë PD, Basir Çollakun. Por krahas kësaj padie, Taulant Balla në një status në “Facebook”, ka paralajmëruar se do të padisë gjithashtu edhe nënkryetarin e PD, Edi Paloka pas deklaratës që ky i fundit bëri dje. “E garantoj Lulzim Bashën, gjobaxhiun e rëndomtë të sipërmarrësve, mos guxo të më vendosësh edhe mua gjobë me kusht mospërballjen. Je shumë i dobët për mua Lulzim.
Mirë kryetar partie nuk di ta besh, duke e degraduar PD në një organizatë banale babalesh, po mos guxo të bësh më as regjisorin apo skenaristin, sepse qenke për turp. Nesër këtij kallëzimi do t’i bashkëngjitet si i kallëzuar edhe shpifësi profesionist, Edi Paloka. I cili nuk e ka problem të vijë në gjykatë dhe të thotë se ai thotë çfarë i thotë partia, prandaj është i pafajshëm, po sidoqoftë pa këtë shpifës qesharak në bankën e të akuzuarve, kjo komedi e zymtë nuk e merr kuptimin e saj të plotë”, tha ai.
Zbardhen dokumentet për ngjarjen në Krujë
Denoncimi i bërë nga ana e ish-oficerit Emiljano Nuhu si dhe deklarata e bërë nga shtetasja Xhisiela Maloku dy ditë më parë ka trazuar akoma më shumë klimën politike në vend duke mbushur akoma me më shumë mister këtë ngjarje. Dje, janë zbardhur dokumentet si dhe shumë prova të tjera në lidhje me këtë ngjarje. Sipas dëshmisë të bërë në procesverbalin e datës 30.07.2018 nga ana e shtetases Xhisiela Maloku, ajo ka denoncuar djalin e deputetit Rahman Rraja, Rexhep Rrajën se e ka dhunuar fizikisht dhe e ka djegur me cigare teksa nuk mohon lidhjen me të.
“Unë ndejta me të në hotel rreth një orë, gjatë kohës që ndejtëm në hotel më gjuajti me shpulla, me grushta dhe më drejtoi pistoletën. Më dogji me cigare në kofshë dhe më goditi në pjesën e kokës me pistoletë. Mua më ra të fikët dhe u përmenda më vonë nuk më kujtohet a bëmë marrëdhënie seksuale, kur u përmenda po më merrte me të mira dhe më pas unë dola më para nga hoteli”, thuhet në procesverbal. Por nga ana tjetër, gazetari investigativ Artan Hoxha ka zbardhur dokumenta ku ka rrëzuar argumentimet e ish-oficerit Nuhu se kallëzimet e bëra prej saj në komisariatet e Tiranës nuk ishin pranuar. Sipas gazetarit të gjitha pretendimet e Nuhut bien pasi ai nuk rezulton në asnjë prej procesverbaleve të policisë.
Hoxha gjithashtu nxori dje një foto ku tregoi se Emiljano Nuhu ishte në Zvicër së bashku me Dritan Zaganin. Provë kjo që ka rritur akoma më shumë dyshimet në lidhje me këtë ngjarje. Dje gjithashtu janë publikuar në media dhe mesazhet mes Emiljano Nuhut me Ramazan Rrajnë, nipin e deputetit të PS, ku tregohet se mes tyre ka njohje.
Endri Arizi
