Struktura e Posaçme Antikorrupsion dhe Byroja Kombëtare e Hetimit do të jenë gati brenda vitit.Ministrja e Drejtësisë, Etilda Gjonaj ka dhënë dje detaje për punën mbi ngritjen e organeve antikorrupsion. Në seancën dëgjimore që u zhvillua në Komisionin për Integrimin Europian, Gjonaj teksa u pyet nga deputetja e PD, Jorida Tabaku mbi institucionet e reformës në drejtësi, u shpreh se të gjitha institucionet do të jenë gati brenda vitit. Madje ministrja u ndal edhe tek krijimi i SPAK dhe Byrosë Kombëtare ku tha se do të marrin jetë 2 muaj pas ngritjes së KLP dhe KLGJ. Ajo tha gjithashtu se kanë filluar të trajtohen edhe gjyqtarët dhe prokurorët e parë që do të jenë pjesë institucioneve antikorrupsion nga ana e ekspertëve ndërkombëtarëve. “Ministria e Drejtësisë jo vetëm që po jep komentet, por po bën edhe takime me grupet e interesit për të kuptuar si mund të përmirësohen këto drafte. Presim rezultatet sot nga Komisioni i vetingut, të cilët edhe këta kandidatë anëtarë që vijnë nga gjyqtarët dhe prokurorët për institucionet e reja të KLGJ e KLP të votohen. Presim rezultatet e para, me qëllim që këta kandidatë të konsiderohen të vlefshëm e të kalojnë procesin e vetingut, institucionet e reja fillojnë menjëherë nga funksionimi i tyre. Sa i takon pyetjes së zonjës Tabaku për ngritjen e SPAK mund tu them që do të ngrihet 2 muaj pas ngritjes së KLP dhe KLGJ. Dhe unë mendoj se brenda vitit 2018 këto organe duhet të ngrihen. Gjithashtu jemi në fazën që po punohet me ekspertët ndërkombëtarë të cilët po merren me trajnimet e specialistëve që do luftojnë korrupsionin”, tha ministrja e Drejtësisë Etilda Gjonaj. Ndërkohë sipas burimeve të gazetës deri më tani janë trajnuar një sërë ekspertësh nga fusha të ndryshme si ajo e krimit ekonomik, çështjeve ligjore etj. të cilët do të bëhen pjesë e Byrosë Kombëtare të hetimit.
Gjonaj: Reforma garanton pavarësinë e gjyqësorit
Ministrja e Drejtësisë, Etilda Gjonaj gjatë seancës dëgjimore në Komisionin e Integrimit tha gjithashtu se reforma në sistemin e drejtësisë është më e madhja që është ndërmarrë ndonjëherë në vend. Mes të tjerash Gjonaj deklaroi se sistemi gjyqësor nuk do të jetë më selektiv dhe i ndikueshëm nga politika. “E pranuam vetë të gjithë që kur miratuam Kushtetutën në vitin 2016, që pushteti gjyqësor të jetë i pavarur nga politika. Ulëm rolin e ministrit të Drejtësisë. Në qoftë se sot në periudhën tranzitore ministri i Drejtësisë ka dhe një kompetencë, ka dhe një rol edhe në Këshillin e Lartë të Drejtësisë, apo edhe në organe të tjera të drejtësisë, me drejtësinë e re i gjithë roli i ministrit dhe i qeverisë shqiptare është minimizuar për ta lënë këtë pushtet të pavarur dhe të vetëfunksionojë”, u shpreh ajo. Ministrja Gjonaj theksoi ndër të tjera se qeveria shqiptare është e angazhuar maksimalisht në ngritjen e institucioneve të drejtësisë. “Qeveria shqiptare është angazhuar në mënyrë të jashtëzakonshme dhe ka mbështetur financiarisht në infrastrukturë dhe me strukturë, institucionet e reja që kanë të bëjnë me Vettingun e gjyqtarëve dhe prokurorëve, apo të të gjithë subjekteve të rivlerësimit kalimtar. Është bërë e mundur edhe nga Ministria e Drejtësisë vënia në dispozicion e ambienteve për këto komisione. Qeveria shqiptare përveç se pagës me VKM, u ka dhënë një shtesë page me 50% për anëtarët e këtyre komisione, me qëllim që të kryejnë misioni i tyre në mënyrën më optimal të mundshme”, tha Gjonaj.