Kryeministri Edi Rama është ‘përplasur’ me homologun e Kosovës Ramush Haradinaj për çështjen e demarkacionit me Malin e Zi. Rama deklaroi sonte në ‘Klan Kosova’ se Demarkacioni me Malin e Zi do të duhej të votohej me kohë, pasi nuk ishte asgjë tjetër përveçse një ide e shpikur nga politika e brendshme e Kosovës.
“Demarkacioni do të çlirojë më në fund popullin e Kosovës nga pengesa e tmerrshme e vendosur nga BE-ja për të lëvizur lirisht në Europë, pasi nuk ka qenë e drejt që kjo lëvizje të kushtëzohet me demarkacionin dhe është e turpshme për Bashkimin Europian. Këtë ua kam thënë në sy të gjithëve atyre që kam takuar në BE.
Por çështja e Demarkacionit ka edhe një komponentë tjetër; ka rrezikuar seriozisht reputacionin e Kosovës në arenën ndërkombëtare. Ka rrezikuar besimin dhe mbështetje e partnerëve strategjikë të Kosovës dhe shqiptarëve, pasi refuzimi për ta ratifikuar këtë marrëveshje është mungesë serioziteti nga Kosova.
Në ndërkohë që miqtë e mëdhenj të shqiptarëve janë të angazhuar në zgjedhjen e problemit real mes shqiptarëve dhe serbëve, demarkacioni është një problem i shpikur nga politika e brendshme e Kosovës që nuk ka asnjë bazë reale dhe që është një padrejtësi ndaj njerëzve të këtij vendi.
Por unë kam ndeshur një mur të shurdhër sa herë kam folur për këtë dhe sa herë kam përcjell këtu atë që kam dëgjuar në takimet me homologë në nivelet më të larta të marrëdhënieve ndërkombëtare” deklaroi ai” tha Rama.
Por e menjëhershme dhe e ashpër ka qenë përgjigja e kryeministrit Ramush Haradinaj pas kritikave. Shefi i qeverisë së Kosovës i ka kërkuar Ramës që të shikojë punët e veta në Shqipëri. “Urime pavarësia e Kosovës të gjithë shqiptarëve. Edi Rama nuk ka çfarë të flasë për shpikjet politike në Kosovë! Le të merret me shpikjet e veta brenda Shqipërisë se i dalin boll“, shkruan Haradinaj në Facebook. Marrëveshja me Malin e Zi është zyrtarizuar sot.
Por tashmë lajmi qëndron në faktin se kjo është hera e parë që ndodh një ‘përplasje’ e këtij niveli mes dy kryeministrave të dy vendeve shqipfolëse, aq më tepër në përvjetorin e 10 të Pavarësisë së Kosovës, ku Rama nesër është i ftuar në disa aktivitete, ndërsa sot u dekorua nga Thaçi. Përgjigja e fortë e Haradinajt për Edi Ramën duket se është një mesazh edhe në kuadër të 10-vjetorit, se tashmë Kosova është e pavarur….
d.b/shqiptarja.com