Shqiptarët kanë dëgjuar, parë dhe lexuar në të gjitha mjetet e informimit publik lajmin “e zeza mbi të bardhë” për shpalljen “non gratta” të ish Prokurorit të Përgjithshëm të Shqipërisë Adriatik Llalla. Bashkë me të dhe familja e tij, duke filluar nga bashkëshortja e fëmijët dhe përfunduar tek njeriu më i afërt sa kohë ishte Kryeprokuror, Rovena Gashi.
Ndoshta për herë të parë është praktikuar një padëshirueshmëri e tillë për zyrtarë të lartë të vendeve që janë aspirante për të hyrë në BE. Eshtë bërë listë e tillë për oligarkët dhe zyrtarët e lartë rusë, për disa nga eksponentët që akuzohen për krime lufte por dhe për vepra të tjera penale në Ballkan dhe disa dhe nga hapësira mbarë shqiptare në rajon. Por nuk është bërë asnjëherë për kreun e prokurorisë së një vendi apo për zyrtarë e ish zyrtarë të lartë të një vendi, të cilët nuk kanë marrë vendim të formës së prerë në dënimet e tyre. Në Shqipëri ndodhi me Llallën.
Masën ekstreme ndëshkuese e firmosi vetë Sekretari Amerikan i Shtetit Rex W. Tillerson, i cili vendosi moslejimin e Adriatik Llallës dhe gruas së tij të hyjë në Amerikë.
Madje ky proces mund të quhet pa frikë dhe nisje e procesit ndëshkues kundër të korruptuarve në Shqipëri. Që janë në radhë. Në krye të listës është ish kryeministri Sali Berisha, ish kreu i LSI, Kuvendit e aktualisht President i vendit Ilir Meta, bashkëshortja e tij dhe kryetare e LSI Monika Kryemadhi, kryetari i PD Lulzim Basha, nënkryetari i LSI Petrit Vasili dhe një sërë zyrtarësh të kësaj partie. Të cilët i kanë plotësuar të gjitha “kushtet” për të qënë në listën e atyre që u ka shkuar emri në DASH për firmë, për tu shpallur përsona të padëshirueshëm për SHBA dhe për të mos ju lejuar hyrja familjarisht në SHBA. Vendim që pritet të merret shpejt. Pasi që nga Berisha, Meta, Basha, Monika, Vasili, Manjani, Luan Rama e një sërë zyrtarësh të tjerë jo vetëm janë të akuzuar për korrupsion, por kanë akuza konkrete për krime.
Berisha për “Gërdecin”, “21 janarin”, “Rrugën e Kombit”, aferën e “CEZ” dhe akuza të tjera të rënda.
Meta për vjedhjen e floririt në Kërrabë, vagonët austriakë, trafikun e drogës me Klemend Balilin dhe Almir Rrapin, përgjimin 700 mijë euro të Priftit, abuzimin me rrugët dhe futjen në dorë të tërë pasurive të vendit.
Monika po ashtu se ka nxjerrë para dhe drogë me karrocë fëmijësh jashtë vendit, për pasuri të pajustifikuar etj.
Basha për Rrugën e Kombit, 21 janarin, dhe akuza të tjera. Por dhe Vasili me “noterët” dhe “byzylykët”, bashkë me Manjanin. Ky i fundit dhe marrëdhënien me Klemend Balilin dhe pengimin e drejtësisë për ta kapur. Të gjitha këto dosje FBI amerikane dhe DEA amerikane e antidrogës i kanë të kopsitura.
Këto pushtetarë jo vetëm kanë abuzuar me pushtetin, por kanë sulmuar dhe SHBA-në në mënyrë të drejtëpërdrejtë. Kanë sulmuar përfaqësuesin e SHBA në Tiranë ambasadorin Donald Lu duke cënuar rëndë interesat e SHBA, partnerit tonë strategjik që ka investuar dhe po investon në demokracinë shqiptare, drejtësinë shqiptare, ekonominë shqiptare, ushtrinë shqiptare dhe ka qënë përmbi një shekull në krahun e shqiptarëve në tërë hapësirën ku jetojnë. Kështu që krerët e politikës, pa përjashtuar dhe nga radhët e mazhorancës pritet që të pasojnë Adriatik Llallën në listën e personave që do t’u ndalohet hyrja në SHBA. Vendim që tashmnë është për firmë.
Sulmet e Metës, Berishës, Bashës, Monikës, Vasilit e tërë opozitës kundër Lu e SHBA
Presidenti i Republikës Ilir Meta është i pari në listën e personave të cilët do të shpallen të padëshirueshëm dhe do t’u ndalohet hyrja në SHBA.
Në mënyrë të hapur, Meta ka sfiduar ambasadorin Lu duke thënë se nuk do të ketë dy procese vettingu, një nga SHBA dhe një nga Gjermania; por vetëm një, nga Shqipëria. Reagimi ka ardhur pas deklaratave të Donald Lu për revokimin e vizës dhe skadimin e mandatit të Adriatik Llallës dhe letrës kundër ambasadorit që shpalosi ky i fundit.
“Ambasadori ka një vend të veçantë sepse Amerika ka një vend të veçantë në raportet tona. Të jeni të sigurt që po të ishte ambasadori i një vendi modest, shumë prej veprimeve dhe sjelljeve do të ishin të papranueshme”, ka hedhur “spondën” Meta kundër Donald Lu. Por nuk është mjaftuar me kaq, pasi ka hedhur tërë zarat e tij kundër ambasadorit amerikan.
Ka nxjerrë Ralf Gjonin, një ndër njerëzit më të afërt të tij, shef kabineti kur ish-kreu i LSI ishte kryetar parlamenti dhe për të cilin sa herë bënte deklarata të Metës por që goditeshin nga opinioni, vetë Meta thoshte se Ralfi është i papërgjegjshëm. Meta përmes Ralfit ka thënë se “njerëzit kanë zgjedhur të bëjnë humor me këtë deklaratë të Lu-së, po tallen më saktë”. Gjoni tha më tutje se “askush në Amerikë s’mund të bëjë deklarata të tilla”.
Ndërsa vetë Meta ka shpërthyer ndaj ambasadës amerikane në Tiranë, duke mbajtur anën prokurorëve dhe gjykatësve që u është hequr vizat.
S’ka qëndruar më pas as bashkëshortja e Metës, Monika Kryemadhi teksa ka vazhduar replikat me ambasadorin amerikan Donald Lu. Kryemadhi ironizoi Lu duke i shprehur se Shqipëria është populli më i vjetër në Ballkan e s’pranon nderhyrjen e jabanxhinjëve.
“Shqiptarët janë populli më i vjetër në Ballkan, një popull me shpirt e zemër të madhe, që presim e respektojmë miqtë. Por jemi dhe një popull që punët në shtëpitë tona i zgjidhim vetë dhe nuk i lëmë jabanxhinjtë të na i bëjnë”, sulmon Kryemadhi Donald Lu.
Ndërsa Vasili thotë se “kush nuk e sheh është miop, kush e sheh dhe e mbështet kapjen e kryeprokurorit nga kryeministri, nuk është mik i Shqipërisë. Kush “harron” qellimisht Komisionin e Venecias dhe bëhet bashkëautor i një faji të rëndë kushtetues, shkatërron përfundimisht reformën në drejtësi dhe legjitimon kapjen e saj nga krimi dhe trafiqet. Komisioni i Venecias ka folur qartë, asnjë komision ligjesh i kapur apo me keq akoma ndonjë mision i huaj nuk mund të dalë mbi Komisionin e Venecias që është institucioni me autoritar në nivel botëror dhe të cilin e kanë falenderuar të gjithë për reformën në drejtësi në Shqipëri; e kanë falenderuar edhe në shqip edhe në anglisht. Po jua rifreskoj memorjen me percaktimet e Komisionit të Venecias kjo është edhe një mundësi për disa për të rifreskuar ndërgjegjen“, shkruan Vasili. Duke sulmuar ambasadorin e SHBE dhe atë të BE. Por nuk kanë mbetur prapa as Manjani dhe Luan Rama që kanë kërkuar mospërzierjen e ambasadorit të SHBA në punët e Shqipërisë. Ndërsa ish-kryeministri Sali Berisha ka akuzuar ambasadorin Lu për korrupsion dhe se konflikt interesi në këtë çështje, duke iu referuar ish prokurorit.
“Llalla e ka akuzur Lu-në për korrupsion. Lu-ja duhet t’i përgjigjej për këto akuza. E ka akuzuar se më ka ardhur në zyrë dhe më ka kërkuar të ndërpresë hetimet për X cështje. Unë kam prit që zoti Lu t’i përgjigjet. Gjëja më e rëndë që ka ndodhur në 27 vite janë akuzat e kryeprokurorit për një ambasador. Derisa ambasadori nuk ka reaguar do të thotë që ka diçka”, u shpreh Berisha. Ndërsa Basha ka thënë me tone të ashpra se është kushtetuta ajo që përcakton se kryeprokurorin e zgjedh KLP e se interpretimin e Kushtetutës, nuk u takon ambasadave për ta bërë.
“Interpretimi i Kushtetutës nuk është detyrë e ambasadave dhe as e misioneve ndihmëse”. Dhe deklarata të tjera “sovraniste” të Bashës kundër SHBA
Ligjet dhe vendimet amerikane, kundër zyrtarëve shqiptarë për t’i shpallur “non gratta”
Në argumentimin ligjor dhe Kushtetues të sekretarit amerikan të shtetit Tillerson për të firmosur shpalljen e padëshirueshëm në SHBA të ish kryeprokurorit Adriatik Llalla thuhet se “zyrtarët qeverive të huaja dhe anëtarët e familjes së tyre, për të cilët Sekretari i Shtetit ka informacion të besueshëm se janë të përfshirë në korrupsion, përfshi dhe për nxjerrjen e burimeve natyrore, apo shkeljen e të drejtave të njeriut, u ndalohet hyrja në SHBA. Sekretari informon gjithashtu publikisht ose privatisht zyrtarët e qeverive të huaja dhe anëtarët e afërt të familjes, për të cilët ka informacion të besueshëm, nëse kanë aplikuar për vizë.
Individët të cilëve u refuzohet hyrja mund të lejohen në SHBA nëse kjo ndihmon objektiva të rëndësishme të agjencive të ligjit ose është e nevojshme për të zbatuar detyrimet e SHBA në lidhje me konventat e OKB, në rast se nuk përmban asgjë nga përcaktimet në paragrafin 1 ose nuk cenon detyrimet ndërkombëtare të SHBA”.
Ndërkohë që ka dhe një vendim presidencial që do të zbatohet për pushtetarët shqiptarë. Në të përcaktohen dhe kategoritë që rrezikojnë të shpallen “non grata”. Bëhet fjalë për vendimin 7750, i cili ndalon të gjithë shtetasit e huaj që të futen në SHBA nëse janë të korruptuar.
Sipas tij, nuk do lejohen në SHBA nëpunësit publikë ose ish-zyrtarët publikë të cilët kanë kërkuar apo pranuar vlera monetare, ose ndonjë përfitim tjetër, në këmbim të një veprimi apo mosveprimi në kryerjen e funksioneve të tyre publike. Po ashtu, personat të cilët përfitojnë ose ofrojnë vlera monetare apo përfitim tjetër, për çdo zyrtar publik në këmbim, të një akti apo lëshimi në kryerjen e funksioneve publike.
Nëpunësi publik ose ish-zyrtari publik i cili ka shpërdoruar fondet publike apo ka ndërhyrë në proceset gjyqësore, elektorale, apo procese të tjera publike. Gjithashtu u ndalohet hyrja në SHBA edhe e bashkëshortëve, të afërmve, familjarëve apo fëmijëve të personit që dyshohet se është i korruptuar, të cilët mund të kenë përfituar nga paratë e marra në mënyrë jo ligjore.
Në urdhrin e presidentit amerikan theksohet gjithashtu se një gjë e tillë bëhet për të ndaluar dëmtimin e shtetit demokratik në SHBA nga këta persona. Një tjetër përcaktim është se shpallen “non grata” ata individë që nëpërmjet korrupsionit kanë dëmtuar interesat e SHBA, kanë dëmtuar bizneset amerikane, apo kanë dëmtuar asistencën që jep SHBA për shtete të ndryshme me qëllim zhvillimin e institucioneve dhe demokracisë./Pamfleti.com