Rruga për ngritjen e Këshillit të Lartë Gjyqësor është zyrtarisht e hapur. Deri para pak ditësh ky proces ishte futur në ngërç sepse mungonin kandidatët nga Gjykatat e Apelit të rretheve, por më pas shfaqën interes dy emra: Luan Dervishi nga Gjykata e Apelit të Shkodrës dhe Brikena Ukperaj nga Gjykata e Apelit të Vlorës. Ndërkohë dje, Gjykata e Lartë bëri publike listën e plotë të të gjithë kandidatëve përfundimtarë për KLGJ. Nga Gjykata e Lartë i vetmi kandidat është Medi Bici.
Nga Gjykata e Apeleve kanë kandiduar: Ilir Toska–Gjykata e Apelit Tiranë; Nertina Kosova–Gjykata e Apelit për Krime të Rënda; Luan Dervishi–Gjykata e Apelit Shkodër dhe Brikena Ukperaj–Gjykata e Apelit Vlorë.
Nga Gjykatat e Rretheve Gjyqësore janë 6 emra që pretendojnë të jenë anëtarë të Këshillit të Lartë Gjyqësor: Alma Brati-Gjykata e Rrethit Gjyqësor Tiranë; Astrit Faqolli-Gjykata e Rrethit Gjyqësor Tiranë; Brunilda Kadi-Gjykata e Rrethit Gjyqësor Tiranë; Manjola Xhaxho-Gjykata e Rrethit Gjyqësor Tiranë; Marçela Shehu-Gjykata e Rrethit Gjyqësor Kurbin dhe Dritan Hallunaj-Gjykata e Shkallës së Parë për Krime të Rënda.
Përmes publikimit të kësaj liste nga ana e Gjykatës së Lartë, tregohet se tashmë i vetmi peng që ka mbetur për ngritjen e Këshillit të Lartë Gjyqësor është hedhja e shortit për kandidatët gjyqtarë. Sipas parashikimeve ligjore, Këshilli i Lartë Gjyqësor është një organ kolegjial që përbëhet nga 11 anëtarë, gjashtë prej të cilëve janë gjyqtarë nga të gjitha nivelet e pushtetit gjyqësor dhe 5 të tjerë janë anëtarë jo-gjyqtarë. Këta të fundit janë zgjedhur para disa kohësh nga Parlamenti me short, ndërsa 6 anëtarët e tjerë duhet të zgjidhen nga Konferenca Gjyqësore e Gjykatës së Lartë.
Pra deri tani është pritur pikërisht kjo mbledhje që të hidhet hapi final për ngritjen e KLGJ. Duhet theksuar fakti se tani janë të gjitha kushtet që Konferenca Gjyqësore të mblidhet dhe të nisë nga puna për konstituimin e Këshillit të Lartë Gjyqësor. Kjo për faktin se të gjithë kandidatët nga Gjykata e Lartë dhe nga Gjykatat e Rretheve Gjyqësore kanë kaluar me sukses “testin” e vetingut.
Ndërsa nga Gjykatat e Apeleve i vetmi emër që nuk ka kaluar akoma në filtrat e vetingut është Luan Dervishi. Ky i fundit është një ndër dy kandidatët për KLGJ nga Apeli i rretheve, ndërsa kandidatja tjetër, Brikena Ukperaj e ka kaluar tashmë vetingun, duke i hapur rrugë përfundimisht mbledhjes së gjyqtarëve të të gjitha niveleve.
Ngritja e SPAK shumë pranë
Fare pak ditë na ndajnë nga ngritja e Këshillit të Lartë Gjyqësor, por kjo do të thotë se e afërt është edhe dita për ngritjen e Strukturës së Posaçme Antikorrupsion. Sipas ligjit, dy muaj pas ngritjes së KLGJ, ngrihet Struktura e Posaçme Antikorrupsion dhe Byroja Kombëtare e Hetimit. Këto institucione që do të shfarosin njëherë e përgjithmonë luftën ndaj korrupsionit në vend. Por edhe pse KLP mund të vijojë të jetë e bllokuar, me ngritjen e KLGJ askush nuk mund ta pengojë ngritjen e SPAK, i cili do të godasë korrupsionin në të gjitha nivelet.
Pra duke parë se brenda muajit tetor-nëntor do të ngrihet Këshilli i Lartë Gjyqësor, me shumë mundësi fillimi i 2019-ës do të sjellë edhe ngritjen e SPAK. Ndërkohë, vlen të theksojmë, se ndërkombëtarët prej kohësh kanë nisur trajnimet e anëtarëve që do të jenë pjesë e SPAK dhe BKH. Por krahas kësaj, me ngritjen e institucioneve të reja të drejtësisë rriten shpresat edhe në lidhje me integrimin e vendit pasi Bashkimi Europian i ka vendosur Shqipërisë si kusht kryesor për anëtarësimin zbatimin e reformës në drejtësi dhe nisjen e luftës antikorrupsion./Mimoza IBRA