Dekreti i Presidentit për ‘lojërat e fatit’ ka shkaktuar debate në distancë mes këtij institucioni dhe kreu të komisionit të ekonomisë.
Një ditë pasi institucioni i presidëncës justifikoi mungesën e tij në mbledhjen e komisionit të ekonomisë, ku diskutohej dekreti për “Lojërat e Fatit”, me argumentin se nuk kishin ftesë zyrtare nga Kuvendi, ka reaguar sot kreu i këtij komisioni Erion Brace, i cili u shpreh se kush kërkon të dijë më shumë mbi rregulloren e kuvendit duhet t’i drejtohet administratës, ndërsa sqaroi edhe një herë arsyen e rrëzimit të dekretit në komision.
“Dekreti i Presidentit materialisht ishte i vërtetë por në përrmbajtje ishte i rremë. Dua të sqaroj se ligji për tatmin mbi të ardhurat ka në thelb uljen e tatim fitimit për biznesin e vogël, për shoqëritë e bashkëpunimit bujqësor e blegtoral dhe uljen e tatim fitimit për të gjithë sektorin e agroturizmit”- u shpreh Brace.