Teksa opozitarët “kërcënojnë” për dhunë dhe destabilitet me çështjen e teatrit, Partia Socialiste vendosi dje që shqyrtimi i tij të shtyhet për datën 20 shtator. Sipas informacioneve, ishte deputeti i PS, Eduart Shalsi ai i cili e propozoi një gjë të tillë, ndërsa pas mbledhjes Ulsi Manja e pohoi në një dalje për mediat. “Një ndër projektligjet e rëndësishme që përbën dhe sensibilitet është dhe dekreti i presidentit.
Meqë është depozituar gjatë kohës që Kuvendi ishte shpërndarë u kërkua nga Komisioni për Veprimtarinë Prodhuese, që ky dekret të mos jetë në datën 13 shtator por atë të datës 20 pasi komisioni përgjegjës ka nevojë për kohë për të hartuar relacionin përgjegjës.
Këtë vendosi sot Konferenca e Kryetarëve. Dekreti do të kalojë në të gjitha filtrat e nevojshme. Nga opozita u ngritën shqetësimet e zakonshme, por puna jonë është e fokusuar tek qytetarët.
Ne do fokusohemi në një proces ligjbërjeje, siguri publike dhe reduktimin e varfërisë”, deklaroi kryetari i Komisionit të Ligjeve, Ulsi Manja.