Vandalizmat ndaj biçikletat mund ta shtyjë “Mobike” të largohet nga Manchesteri duke e bërë qytetin anglez të parin në botë që braktiset nga firma kineze.
Nëpërmjet një përfaqësuesi, ‘Mobike’ ka deklaruar së një numër i madh biçikletash në Manchester janë dëmtuar, vjedhur ose hedhur në kanal.
Sipas Steve Milton, udhëheqësi i komunikimit global dhe i marketingut të “Mobike”, çdo muaj rreth 10% e flotës në Manchester është zhdukur, shkruan “The Guardian”.
Shumë biçikleta janë gjetur sipër shtyllave, të braktisura nëpër qendra tregtare, të mbyllura në parkingje makinash apo të fshehura nëpër shkurre. Disave u ishin hequr GPS dhe ishin lyer me ngjyra të tjera.
“Ky nuk është një kërcënim i kotë. Humbjet janë të papërballueshme. Të gjithë janë të pakënaqur me situatën aktuale. Përdoruesit janë të pakënaqur sepse nuk mund të gjejnë biçikleta kur duan, policia është e pakënaqur sepse humb kohë me vandalizma dhe ne jemi të pakënaqur sepse nuk jemi duke ofruar shërbimin që duam”, deklaroi Milton.
Kujtojmë që biçikletat “Mobike” prej disa muajsh janë vënë në dispozicion edhe nga Bashkia e Tiranës. Po ashtu si në Manchester, edhe në kryeqytetin shqiptar ka patur raportime për dëmtimin e tyre./BW