Qeveria shqiptare është vënë në lëvizje që organet e reja të drejtësisë të ngrihen sa më parë. Këshilli i Lartë Gjyqësor dhe Këshilli i Lartë i Prokurorisë po përjetojnë disa momente ngërçi, sepse mungesa e kandidatëve pengon ngritjen e tyre. Por vonesa në ngritjen e këtyre dy organeve do të thotë se edhe Struktura e Posaçme Antikorrupsion dhe Byroja Kombëtare e Hetimit nuk konstituohen dot. Sipas ligjit, SPAK dhe BKH ngrihen dy muaj pasi të jetë bërë ngritja e KLGJ dhe KLP.
Pavarësisht situatës momentale, qeveria ka bërë gati planin për SPAK. Ky institucion pritet që të ngrihet përgjatë muajve të vjeshtës dhe një gjë e tillë mund të kuptohet nga projektvendimet e qeverisë të përgatitura për miratim në 4-mujorin e fundit të vitit, por edhe nga plani i EURALIUS. Misioni i Bashkimit Evropian në vendin tonë ka bërë një plan paraprak për këtë strukturë të re të drejtësisë dhe midis të tjerash aty thuhet se do të shpenzohen plot 1 milion euro për pajisje speciale që do të bëjnë luftën antikorrupsion.
Ndërsa qeveria ka bërë gati një sërë projektvendimesh, të cilat pritet të miratohen përgjatë muajve shtator, tetor, nëntor dhe dhjetor. Midis tyre bëhet fjalë edhe për një projektvendim që ka për qëllim të ruajë sigurinë e emrave që do të luftojnë korrupsionin. “Projektvendim-Për rregullat dhe procedurat për mbrojtjen e veçantë të magjistratit gjatë ushtrimit të funksionit ose për shkak të tij; Ministri propozues dhe bashkëpropozues: Ministri i Drejtësisë dhe ministri i Financave dhe Ekonomisë; Katërmujori III; Qëllimi dhe objektivat e projekt-aktit: Ofrimi i mbrojtjes të veçantë nga shteti në rast se jeta, shëndeti dhe pasuria e magjistratit ose familja e tij janë në rrezik.
Konsolidimi i garancive të statusit të magjistratit, përgjegjësisë dhe llogaridhënies në ushtrimin e detyrë. Përcaktimi i rregullave dhe procedurave që do ndiqen për mbrojtjen e magjistratit”, thuhet në dokumentin e siguruar nga gazeta.
Garantimi i sigurisë së personelit të SPAK
Qeveria po ashtu pritet të miratojë në muajt e vjeshtës edhe një projektvendim që do të garantojë sigurinë jo vetëm të magjistratëve, por edhe të të gjithë personelit të gjykatave dhe prokurorive antikorrupsion. “Projektvendim – Mbi procedurën e sigurisë së personelit të e gjykatave kundër korrupsionit dhe krimit të organizuar, të Prokurorisë së Posaçme dhe të Byrosë Kombëtare të Hetimit; Ministri propozues dhe bashkëpropozues: ministri i Drejtësisë dhe ministri i Financave dhe Ekonomisë; Katërmujori III; Qëllimi dhe objektivat e projekt-aktit: Miratimi i Rregullave të detajuara mbi procedurat në lidhje me garantimin e sigurisë së personelit të këtyre institucioneve.
Garantimi i ruajtjes së jetës shëndetit për shkak të statusit që gëzojnë gjatë ushtrimit të detyrë Procedurat të detajuara për garantimin e sigurisë së personelit të këtyre institucioneve”, thuhet në dokument. Po ashtu qeveria ka në plan të garantojë edhe sigurinë në ambientet përreth Strukturës së Posaçme Antikorrupsion. Sipas ”SOT” edhe për këtë pikë është përgatitur një projektvendim që parashikohet të miratohet në katërmujorin e fundit të vitit. Përmes këtyre projektvendimeve të përgatitura nga qeveria për miratim, kuptojmë që SPAK do të ngrihet shumë shpejt dhe do të nisë funksionimi i saj.