Më pak se një muaj mbetet nga ndeshja e parë e Shqipërisë në grupin e saj në Divizionin C të Ligës së Kombeve, ku të parët që vihen përballë kuqezinjve janë izraelitët. Ndeshja do të luhet në “Elbasan Arena” më 7 shtator dhe synimet e trajnerit Kristian Panuci janë për fitore.
Në fakt, kuqezinjtë ndodhen në një grup të vështirë, pasi përvec Izraelit kemi përballë edhe Skocinë, një skuadër që e njohim pak dhe luan një futboll fizik të shkallës maksimale. Parë nga emrat dhe cilësitë e grupeve, për tanët nuk do të jetë aspak e lehtë që të arrijnë objektivin dhe objektivi është vendi i parë në grup dhe pretendimet për një vend në Europianin e ardhshëm.
Por, kur mbeten edhe disa javë nga ndeshja me Izraelin, për kombëtaren ka lajme jo të mira. Dëmtimi i Armand Sadikut është lajmi më i keq, pasi elbasanasi do të mungojë më e pakta gjashtë muaj. Nga ana tjetër, sulmuesit e tjerë si Azdren Llullaku, Bekim Balaj, Sokol Cikalleshi, Rei Manaj e ndonjë tjetër, nuk japin garanci që mund të bëjnë diferencën në repartin ofensiv. Nuk është rastësi që trajneri Kristian Panuçi po u kushton vëmendje sulmuesve të rinj si Kristal Abazaj e Sindrit Guri. Me shumë gjasë, shkodrani do të jetë titullar ndaj Izraelit, pasi nuk kemi sulmues më të mirë për momentin.
Në mesfushë ka shumë dilema. Lojtarë si Memushaj, Xhaka dhe Kaçe nuk kanë qenë muajt e fundit në kapacitet maksimal dhe po të shtosh këtu edhe Migjen Bashën e rënë nga “bateritë”, bëhen një grup lojtarësh me eksperiencë që nuk ofrojnë siguri. Kanë përvojë, por forma e tyre nuk është maksimale. Nga ana tjetër, Abrashi është gjysmë i dëmtuar dhe nuk jep siguri, kurse për Grezdën ka pak informacion se ç’po bën aktualisht. Ramadani, Ndoji e ndonjë nga të rinjtë e tjerë nuk kanë eksperiencë mjaftueshëm për ndeshjet zyrtare dhe kjo mund të jetë me pasoja.
Në mbrojtje është dhe problemi më i madh, pasi, përvec Elseid Hysajt në lartësi maksimale, të tjerët janë me problem serioze. Mavraj dhe Balliu nuk kanë skuadër; Veseli, Gjimshiti dhe Ajeti nuk janë në formë dhe po presin destinacionet e reja, ndërsa në krahun e djathtë të mbrojtjes ku luante më parë Ansi Agolli, Shqipëria nuk ka sot një titullar dhe Panuçi për këtë është direkt fajtor.
I vetmi repart ku ofrohet siguri është porta, pasi të dy gardianët kuqezinj, Etrit Berisha dhe Thomas Strakosha janë në formë të mirë dhe ofrojnë siguri. Ky është një ngushëllim për ekipin që është në këtë periudhë as në tokë e as në qiell, por një ngushëllim dhe për trajnerin Kristian Panuçi që duhet të ketë kuptuar se kombëtarja në këtë moment është në hall.
Ka pasur ditët e fundit mjaft analiza për këtë, por pyetja që i shtrohet Panuçit me të drejtë është: Mister, me kë do ta mundësh Izraelin? Me cfarë skuadre do të fitosh, ku e ke sigurinë?
Një start me humbje do të vinte direkt në pikëpyetje vazhdimësinë e trajnerit italian në krye të Kombëtares, ndërkohë që të rinjtë e shumtë që ai ka afruar në skuadër nuk e kanë kualitetin e tillë që të bëjnë diferencë dhe skuadrat ku luajnë nuk janë në gjirin e kampionateve elitare europiane. Nuk bëhet Kombëtarja vetëm me Hysajn, Berishën e Strakoshën, duhen më shumë. /Pamfleti Sport