Media holandeze i ka kushtuar një artikull të detajuar trafikut të kokainës në Holandë, duke deklaruar se shumë shpejt tregu mund të merret në dorë nga shqiptarët.
Media “wnl.tv” shprehet se shqiptarët po i bëjnë konkurrencë të hapur “Mocro Mafias”, banda më e fuqimshme e trafikut të kokainës në vend, e drejtuar nga marokenët e holandezët.
“Marokenët aktualisht po luftojnë për të bërë transporte të mëdha”, thonë burimet e “wnl.tv” e cila shton se shqiptarët janë partnerë të besueshëm të këtij “biznesi” dhe marrin përsipër të kryejnë transportin.
Lordët e drogës në Amerikën jugore tashmë po i shmangin kontaktet me Mocro Mafian dhe po i drejtohen shqiptarëve, shkruan media holandeze.
“Tashmë ata nuk po e limitojnë veten tek tregtimi i vetëm disa kileve kokainë, por po mbledhin disa qindra kilogramë nëpër portet e Roterdamit”– shprehet një detektiv mbi çështjen, të cilën e përcjell media e huaj.
Në artikull theksohet se policia e ka të vështirë të ndërhyjë dhe mendon se shumë shpejt mund të ketë një përplasje të fortë mes bandave shqiptare dhe Mocro Mafias.
“Kemi frikë nga një përplasje. Deri tani, shqiptarët po shmangin përdorimin e dhunës sa më shumë të jetë e mundur jashtë atdheut të tyre, por ne e dimë se ata nuk shmangen atëherë kur duhet.”
Një tjetër shqetësim është dhe fakti se shqiptarët mundohen të jenë të zhdërvjelët dhe lëvizin me identitete false. Shumë prej atyre që duan të kontrollojnë pjesë të tregut të kokainës nuk jetojnë as në Holandë.
“Ata qëndrojnë në Gjermani, bëjnë biznes në Belgjikë dhe marrin drogë nëpërmjet Roterdamit”, thotë një agjent. “Me kohën që i kemi ata në foto, tashmë janë zhdukur. Ata e dinë saktësisht se si punon policia dhe përdorin dobësitë tona”