Gjashtë të arrestuarit me akuzën e “Prodhimi dhe mbajtja pa leje e armëve luftarake, e municionit dhe lëndëve eksplozive”, kanë mohuar akuzën para Gjykatës së Shkallës së Parë në Elbasan.
Gjatë zhvillimit të seancës për masën e sigurisë ndaj të arrestuarve nga Gramshi dhe Pogradeci, janë mësuar dhe emrat e dy pjesëtarëve të tjerë të grupit, të cilët nuk janë arrestuar ende. Bëhet fjalë për Egdi Hysnellari dhe Rexhep Kasa, të cilët janë shpallur tashmë në kërkim.
ROLET
Gjyqi u zhvillua me dyer të mbyllura dhe pa praninë e medias. Gjyqtari, Ramazan Adviu, dha vendimin për lënien në arrest me burg për Geraldo Yzeirllari, Kristi Maxhari, Kristian Petani, Edmond Abazi, Gazmor Kokla dhe Ergest Lipo, pasi provat e paraqitura nga prokurori Rodvan Sutaj ishin bindëse për akuzën e ngritur ndaj tyre.
Operacioni për kapjen e tyre nisi më 7 shkurt dhe akuzohen se janë pjesë e një grupi të strukturuar kriminal. Gjatë operacionit u sekuestruan 82 kallëpe tritoli, armë dhe drogë. Në bazë të hetimeve 3-mujore të Prokurorisë së Elbasanit, Edmond Abazi rezulton organizatori i grupit.
Sipas burimeve, bëhet e ditur se 39-vjeçari Abazi cilësohet si kreu i këtij grupit që merrej me shitjen e lëndës plasëse. Ndërsa për montimin e mekanizmit të plasjes së tritolit kujdesej Gazmor Kokla, 40 vjeç.
Ky i fundit cilësohej nga grupi si “eksperti”, pasi Kokla e ka mësuar këtë teknikë gjatë kohës që ka punuar në uzinën e demontimit të armëve në Mjekës, disa vite më parë. Për zbulimin e grupit u desh dhe infiltrimi i agjentëve civilë, të cilët në disa raste kanë kryer blerje tritoli.
Nga kjo është mësuar se grupi negocionte me blerësit një çmim, që varionte nga 700 deri 1500 euro. Hetimet për këtë grup nisën pas dyshimeve se ishin përfshirë në trafik droge dhe armësh, ndërkohë që gjatë mbajtjes në përgjim u zbulua se, në fakt, objekti i tyre ishte prodhimi dhe shitja e lëndës plasëse.
Gjatë këtij operacioni, Policia sekuestroi 82 kallëpe lëndë eksplozive, e dyshuar si tritol, 2 armë zjarri, 440 fishekë, 15 celularë dhe 1.5 kg lëndë narkotike kanabis sativa si dhe 3 automjete, 15 celularë, si dhe një sasi e konsiderueshme parash. Arrestimi i të akuzuarve u krye nga forcat e posaçme në disa ndërhyrje në Pogradec dhe në Gramsh./Panorama