Në vitin 2010, ndërkohë që Presidenti i sotëm i Republikës mbante pozicionin e zv. Kryeministrit të vendit dhe si kokë e madhe që është, “u detyrua” të bënte dhe Ministrin e Jashtëm, në kabinetin e tij asokohe punonte një këshilltar.
Këshilltari me inicialet GJ.R, u pikas nga shërbimet partnere të inteligjencës, se ishte takuar disa herë me dy funksionarë diplomatik të Ambasadës Ruse, në Tiranë. Shërbimet partnere, e kaluan këtë informacion të klasifikuar për trajtim të mëtejshëm pranë SHISH, i cili në atë kohë drejtohej nga Bahri Shaqiri (Ari).
Për shkak të lidhjeve miqësore që ky i fundit kishte me z. Meta, ai i tregoi për këtë dyshim të bazuar në prova, që ishte krijuar me këshilltarin e tij, i cili ishte futur në vëzhgim të afërt nga shërbimi shqiptar. Meta në konfidencë kërkoi nga Ari, që kjo çështje të mos implikonte figurën e tij dhe të kalonte në qetësi të plotë pa u diktuar nga askush.
Pas kësaj, për çudinë e të gjithëve, marrëdhëniet midis Metës dhe Arit u bënë shumë “të ngushta” dhe ky i fundit, pas lirimit nga detyra në SHISH, mori funksione të rëndësishme pranë LSI-së, lidhjet të cilat i shfrytëzoi edhe sot, duke punuar si këshilltar në Presidencë.
Me ardhjen e Visho Ajazi Lika në detyrë, shërbimet tona i raportuan në vitin 2013, se këshilltari tashmë i Kryetarit të Kuvendit të Shqipërisë, kishte zhvilluar një tjetër takim sekret me një diplomate ruse. Çështja u bë serioze, sepse partnerëve ju ishte thënë më parë, që personi në fjalë, pas survejimit, nuk kishte dyshime se ishte rekrutuar, apo i ishte ngarkuar ndonjë detyrë konkrete nga rusët.
Duke shfrytëzuar kanalet e komunikimit nëpërmjet ish-Kryeministrit Sali Berisha, Visho i dërgon fjalë Metës, se këshilltarin që nuk e kishte ndarë asnjëherë nga vetja, po e mbanin në kontakt shërbimet e FSB (Agjensia Shtetërore e Sigurisë Ruse). Meta u ndje borxhli për këtë informacion dhe me shumë delikatesë, duke kërkuar mbrojtje për figurën e tij, filloi ta largonte këshilltarin fillimisht nga kabineti i tij dhe më pas edhe nga strukturat partiake që mbante si sekretar.
Mbrojtja që ju bë figurës së Ilir Metës, nga dy shefat e Shërbimit Informatik Shqiptar, ishte një nder i madh, i cili të parit ju shpërblye me poste të larta në administratë, ndërsa të dytit me sigurinë për të qëndruar në krye të detyrës, sapo mori mandatin si President.
Kjo mendohet se është një nga arsyet, që Meta po heziton të dekretojë propozimin e ri për drejtuesin e SHISH, për shkak se në morinë e dokumentave që ai institucion posedon kundër tij, figuron përvëluese marrëdhënia e tejzgjatur dhe përulja e detyruar që ka bërë me dy ish-drejtuesit e SHISH./Tellalli.al