Zbulohen dy raste të pastrimit të parave nga kryetarja e LSI me pasuri të paluajtshme, pastroi 240 mijë euro me një dorë, Meta ia kalon gjithë pasurinë Monikës për t’i shpëtuar burgut
Ilir Meta dhe Monika Kryemadhi janë një sfidë e hapur për çdo kryeprokuror, për shtetin ligjor dhe barazinë para ligjit. Historia e tyre është e thjeshtë. Si të ardhura të ligjshme, Ilir Meta dhe Monika Kryemadhi kanë vetëm dy paga, gjatë 28 viteve të pluralizmit. Nuk kanë asnjë biznes tjetër të deklaruar dhe që mund të kenë paguar taksa. Nga ana tjetër, pasuria e tyre e deklaruar ka një vlerë prej dhjetëra milionë euro.
Rreth 3 milionë euro llogariten vetëm dy vilat, njëra në Bllok dhe tjera në Gjirin e Lalzit, e famshme për 12 tualetet brenda saj. Gjatë dy viteve të fundit, Monika Kryemadhi ka shitur gjashtë apartamente, ku vetëm njërin e ka shitur me vlerë 345 mijë euro. Meta dhe Monika kanë edhe një apartament me sipërfaqe 200 m2, me vlerë 400 000 euro, në Rr. “Brigada 8”, Tiranë. Të mos flasim për pasurinë e fshehur, e cila mendohet se kap një vlerë qindra milionë euro. Kjo pasuri është identifikuar nga ndërkombëtarët, të cilët janë të shokuar se si këta dy personazhe vijojnë të mos ndëshkohen nga drejtësia, por përkundrazi Meta është bërë President, ndërsa Monika vajton për varfërinë.
Monika Kryemadhi është kapur të pakën dy herë duke pastruar para. Rasti i parë bën fjalë për një vilë në Qerret. Monika deklaron një vilë në Golem, me vlerë 60 000 dollarë dhe lulishte 327 m 2. Tre vite pasi e ka blerë, Monika e ka shitur vilën 300 mijë euro. Rasti i dytë konsiston me dhënin e një sipërfaqe toke për ndërtimin e një pallati. Në vitin 2008, Monika ka dhënë një sipërfaqe toke 1900 m2 për ndërtimin e pallatit. Një pjesë të tokës thotë se ja kanë dhuruar, ndërsa pjesën tjetër e ka blerë me kursime. Ka disa vite që Monika ka nisur të shesë hyrjet e pallatit, me vlerë nga 100 mijë euro deri në 340 mijë euro.
Vitet e fundit, Ilir Meta, për t’i shpëtuar burgut, i ka kaluar pasuritë të gjitha në emër të Monikës. Të gjitha transaksionet, blerjet dhe shitjet e pasurive të paluajtshme rezultojnë në emër të Monika Kryemadhit. Ligji anti-mafia, i ndryshuar me ndërhyrjen e SHBA-BE parashikon sekuestrimin e pasurive të politikanëve të nivelit të lartë, nëse nuk i justifikojnë me të ardhura të ligjshme. Ky është një rast flagrant që konfirmon se ky ligj nuk vepron për të gjithë njëlloj. Burgjet shqiptare janë mbushur me njerëz për pastrim parash. Nga ana tjetër, Monika Kryemadhi, jo vetëm nuk është arrestuar, por kërkon të marrë pushtetin bashkë me Lulzim Bashën./Pamfleti