SPAK mori të pandehur ish-kryebashkiakun e Shkodrës, Bardh Spahia. I shoqëruar nga avokati i tij mbrojtës Besnik Cerekja, Spahia mbërriti të martën e 21 janarit në orën 15.30 në SPAK. Report Tv mëson se në pak minuta që qëndroi në ambientet e Prokurorisë së Posaçme, ish-kryebashkiakut iu komunikua zyrtarisht akuza për veprën penale “Pengime për ekzekutimin e vendimeve të gjykatës”.
Spahia ishte denoncuar në SPAK nga ish-drejtori i Ujësjellës-Kanalizimeve në Shkodër Marko Molla të cilin ish-kryebashkiaku e shkarkoi në vitin 2022 dhe vendosi drejtor një anëtar të FRPD-së.
Ish-drejtori e denoncoi për shkarkim në shkelje të ligjit dhe gjykata e riktheu në detyrë, vendim të cilin Bardh Spahia nuk e zbatoi.
Kjo është hera e tretë që Bardha Spahia paraqitet në SPAK, nga sot, person nën akuzë. Më herët ai ka dhënë sqarime për denoncimin ndaj tij, ku siç mësohet gjatë marrjes në pyetje ka pretenduar se ka zbatuar vetëm ligjin dhe sa i takon shkarkimit ai ka pretenduar se kjo është vetëm një çështje që mund të ndiqet administrativisht.