Kryeministri Edi Rama në rubrikën e tij më të re “Sy më sy” i është përgjigjur një komentuesi në lidhje me rrugët në Shqipëri.
Komentuesi shkruan se “rrugë nuk po shohim, por duken vetëm ‘lotet’ e Ballukut”, ndërsa Rama i përgjigjet duke i thënë se Shqipëria sot ka ndryshuar në çdo aspekt dhe se gëzon respektin e të huajve.
“Aurel, Shqipëria tashmë ka ndryshuar, në infrastrukturë, hoteleri, siguri, pastërti dhe ka ekipe profesionale në çdo bashki. Këto i vlerësojnë edhe të huajt. Kohë e çuditshme ka ardhur me ty o miku im shqiptar.
Deri dje të huajt as nuk merreshin me ne, ndërsa sot ndryshimet janë të prekshme. Çuditemi që miliona njerëz vijnë në Shqipëri. Ti thua që rrugët i dëgjojmë, por nuk i sheh.
Nuk ka të verbër më tepër se ai që nuk do të shikojë. Përfshirja e Shqipërisë në Giro D’Italia është certifikata e një Shqipërie të rilindur.
Shqipëria ka fituar respekt në arenën ndërkombëtare. Sot ëndrra jonë me sy hapur është realitet, se ne fitojmë falë një force të madhe popullore, që quhet PS, pa të cilën asnjë ëndërr nuk bëhet dot realitet, që të luftojmë për Shqipërinë që duam, për fëmijët tanë”, shprehet Rama.