Avokati i Ilir Metës, Genc Gjokutaj ka komentuar deklaratat e fundit të deputetes Monika Kryemadhi. Sipas saj, ajo dhe Ilir Meta nuk ruajnë raport të mirë pas divorcit, “pasi e nxisin njerëz pranë tij”.
“Mendoj se është pjesë e një humori të shtuar të zonjës Kryemadhi, s’ka asgjë reale në këtë pjesë. Njerëzit rreth tij kush janë? Unë shkoj e takoj, fëmijët e tij, motra.
E para s’e kemi integritetin të ndërhyjmë dhe e dyta Meta nuk pranon këshillime në tema të tilla”, tha avokati në një intervistë në Klan News.
Ndërsa kanë kaluar thuajse 3 muaj që kur ish-Presidenti i vendit Ilir Meta ndodhet në qeli, gjithë kureshtja në opinionin publik qëndron tek ‘jeta e tij në burg’ tashmë. Lidhur me këtë, Gjokutaj tha se Meta është në gjendje shumë të mirë shëndetësore e emocionale, duke theksuar se vijon me ushtrimin e detyrës së tij politike.
“Nuk besoj që ka interes publik se si e konsumon ditën në qeli, sigurisht zoti Meta merret me materiale. Ai është President i Partisë së Lirisë dhe e ushtron detyrën edhe në kushtet e izolimit.
Është zgjidhur ky problemi i komunikimit sepse letra dhe lapsi ka shekuj që funksionojnë dhe madje janë më të saktat, se sa rruga elektronike apo këto portalet. Ai është prezent, merret me lexim, me atë regjimin e përditshëm. Është në një gjendje shëndetësore ekselente, nuk ka asnjë lloj problemi.“