Aleatët e lideres më të fuqishme të opozitës së Venezuelës, María Corina Machado, thonë se ajo është “rrëmbyer” nga zyrtarët e regjimit, pasi u arratis nga strehimi i saj për të udhëhequr një protestë të madhe kundër presidentit autoritar Nicolás Maduro. Maduro pritet të betohet për mandatin e tij të tretë presidencial të premten, megjithëse ka dyshime të gjera se ai ka vjedhur zgjedhjet e vitit të kaluar, shkruan The Guardian.
Pasardhësi i Hugo Chávezit nuk ka paraqitur asnjë provë të pretendimit të tij për fitoren, ndërsa lëvizja e Machados ka publikuar rezultate të detajuara të votimeve që ofrojnë prova bindëse se kandidati i saj, Edmundo González, ka fituar. Të enjten, mijëra mbështetës të opozitës dolën në rrugë në qytetet e Venezuelës për të protestuar kundër betimit të planifikuar të Maduros, me ftesë të Machados, e cila u fsheh menjëherë pas zgjedhjeve të 28 korrikut 2024 për të shmangur kapjen.
Pas më shumë se 133, Machado u shfaq të enjten pasdite në mesin e një turme të madhe protestuesish në Caracas. Ajo u ngjit në një kamion dhe i udhëhoqi ata në thirrje: “Ne nuk kemi frikë.” Pas një fjalimi, Machado u largua nga protesta, por u “ndalua dhunshëm”, thanë përfaqësuesit e saj në një deklaratë të shkurtër.
“Përfaqësuesit e regjimit hapën zjarr mbi motorët që po e transportonin”, shtuan përfaqësuesit e Machados.
Carla Angola, një gazetarë e njohur venezueliane, shkroi në X: “Regjimi ka rrëmbyer María Corinan.”
Një tjetër gazetar i njohur venezuelian, Luz Mely Reyes, tha se para se të merrej, Machado i kishte thënë ekipit të saj të mos e negocionin lirinë e saj. Duke folur me gazetarët të mërkurën, në një nga intervistat e saj më të fundit të rëndësishme, Machado tha se Venezuela po i afrohet një prej momenteve më të rëndësishme në historinë e Amerikës Latine.
“E vetmja gjë që i ka mbetur regjimit është represioni e vetmja gjë që i ka mbetur është futja e frikës tek venezuelianët dhe nëse venezuelasit mund ta kapërcejnë këtë frikë, represioni do të jetë i pakuptimtë”, shtoi ajo.