Fundjava sportive ka qenë frytdhënëse për disa nga legjionarët kuqezi që luajnë në kampionatet jashtë vendit. Disa prej lojtarëve të Kombëtares kanë dalë te golat, të tjerë kanë qenë protagonist me klubet e tyre.
Cristian Shpendi shënoi golin e nëntë sezonal me Cesenan në Serie B dhe po ndihmon të tijtë për t’u rikthyer në elitën e futbollit Italian. Sulmuesi i kombëtares Shpresa realizoi në sfidën me Reggiana që përfundoi me rezultatin 1-1. Shpendi kryeson klasifikimin e golashënuesve në Serie B me 9 gola në 13 ndeshje.
Nazmi Gripshi fitoi Kupën e Ligës në Kazakistan. Astana, aty ku luan mesfushori me tipare sulmuese mundi 2-0 në finale Zhenis pas 120 minutave lojë. Gripshi ishte në fushë si titullar.
Eneo Bitri është kthyer në golashënues në Hungari, duke tundur rrjetën për të tretën javë radhazi. Mbrojtësi realizoi në barazimin 2-2 të ekipit të tij Gyor ndaj MTK Budapest. Ky është goli i katërt në kampionat për Bitrin, që sheh sezonin më të mirë personal në këtë aspekt.
Myrto Uzuni është bërë ‘shekullor’ te Granada në Spanjë. Beratasi luajti ndeshjen e 100 për klubin e tij, në barazimin 0-0 kundër Cadiz për La Liga 2. Uzuni është një gol larg të qenit legjendë e klubit, pasi do barazonte me 44 gola golashënuesin më të mirë në histori, Youssef El Arabi.
Rey Manaj luajti 12 minuta në barazimin 0-0 të Sivasspor kundër Kasimpasa në Turqi. Edhe pse askush nuk e priste që lushnjari të merre minuta pas dëmtimit të rëndë, trajneri e aktivizoi paçka se rrezikoi; kjo duke i plotësuar dëshirën sulmuesi të Kombëtares.