Liderat e Bashkimit Europian janë mbledhur në Bruksel prej ditës së djeshme, në një javë që parashikohet të jetë vendimtare për unitetin e BE-së.
Çështja më e nxehtë në tavolinë është ajo e emigrantëve, por gjatë samitit do të diskutohet edhe rekomandimi pozitiv i Komisionit Europian për Shqipërinë dhe Maqedoninë, bisedime nga të cilat do të varet hapja e menjëhershme apo shtyrja disa mujore e negociatave.
E ndërsa çështja e rekomandimit është thelbësore për vendin tonë, dita e parë në Bruksel iu dedikua tërësisht çështjes së emigrantëve.
16 prej 28 liderave të BE-së ishin të pranishëm në bisedime. Ky samit është shumë i rëndësishëm për Kancelaren Merkel, e cila gjendet përballë një ultimatumi nga partneri i saj i qeverisjes, për të gjetur një zgjidhje për emigrantët deri në 31 korrik, nëse nuk do të përfundojë në zgjedhje të parakohshme.
Samiti është shumë i rëndësishëm edhe për Italinë, e cila gjatë javës së shkuar refuzoi të pranonte dy anije të mbushura me emigrantë afrikanë. Anijet më pas u ankoruan në Spanjë.
Në këtë takim, italianët kanë paraqitur një strategji me 10 pika, e quajtur “strategjia shumëplanëshe për emigrantët”.
Mbetet e paqartë nëse vendet e BE-së do të përshtasin propozimin Italian sit ë plotë, por nga dita e parë e bisedimeve, duket se ekziston një dakordësim për një listë masash, më e rëndësishmja prej të cilave do të jetë hapja e kampeve të pritjes së refugjatëve në vendet e Afrikës Veriore, nga të cilat nisen imbarkacionet drejt Europës.
Këto qendra do të shërbejnë për të “skanuar” emigrantët përpara se të mbërrijnë në Europë, duke vendosur një filter të rëndësishëm që do të parandalojë kategoritë e emigrantëve të padëshirueshëm.
Qendrat do të financohen dhe do të operohen nga vetë vendet e BE-së, në bashkëpunim me vendet e Afrikës Veriore, të cilave do t’u premtohen përfitime të rëndësishme në rast bashkëpunimi.
Një tjetër masë që duket se do të marrë BE është miratimi i kuotave për emigrantët ekonomikë, si dhe një sistem koordinimi midis të gjithë shteteve të përfshira, që do të bëjë të mundur një shpërndarje më të barabartë mes vendeve anëtare.
Pritshmëria është që këto masa të reduktojnë me 80% fluksin e emigrantëve të jashtëligjshëm deri në fund të vitit 2018.
Midis masave të diskutuara, në asnjë moment nuk u fol për mundësinë e hapjes së kampeve të emigrantëve në vendet kandidate apo negociuese, përfshi edhe Shqipërinë.
Bashkimi Europian ka të qartë që vendet e Ballkanit Perëndimor kanë kapacitete të kufizuara dhe dëshiron që këto kapacitete të vihen në funksion të reformave që duhet të ndërmarrin për të qenë një ditë vende anëtare, e jo të shpërdorohen resurset e pakta në emigrantë.
Përsa i përket Shqipërisë, bisedimet e ditës së parë kanë bërë të qartë që nuk ekziston asnjë strategji apo plan, për të strehuar në vendin tonë jo vetëm 600 mijë emigrantë, por as edhe disa qindra prej tyre.
I vetmi element që mund të diskutohet përsa i përket Shqipërisë, është shqetësimi lidhur me ndryshimin e rrugëve të kalimit të emigrantëve, pas masave më të forta të marra nga disa prej vendeve anëtare si Greqia apo Bullgaria.
Në gjashtë muajt e parë të vitit, në Shqipëri kanë mbërritur në mënyrë të jashtëligjshme 2 311 emigrantë, që synojnë të përdorin vendin tranzit, për të kaluar në Malin e Zi dhe nga aty në Kroaci, një vend anëtar (me synimin për t’u përhapur me pas në gjithë Europën).
Gjatë të gjithë 2017-s, vetëm 1 mijë emigrantë u përpoqën të kalonin kufirin shqiptar në mënyrë të jashtëligjshme.
Përballë këtij fenomeni ende të vogël, por në rritje, BE pritet të kërkojë prej autoriteteve tona një bashkëpunim më të mirë, për të manaxhuar kufirin kombëtar, por skenari i kampeve të refugjatëve në vendin tonë nuk ekziston dhe nuk ka ekzistuar kurrë si një mundësi.