“Kush është më grek? Greku apo unë? Unë do të thoja që jemi të njëjtë, apo jo?”. Kjo terminologji, e cilësuar si raciste, që Donald Trump përdori për t’iu referuar basketbollistit grek të NBA, Giannis Antetokounmpo, ka ngjallur reagime të ashpra në SHBA para zgjedhjeve të së martës.
Trump e bëri deklaratën në një tubim që zhvilloi në stadiumin Milëaukee Bucks, skuadrën për të cilën Antetokounmpo luan në NBA.
“Ekipi juaj është shumë i mirë. Do të thoja që greku është një lojtar shumë i mirë. A jeni dakord? Dhe më thoni, kush është më grek? Greku apo unë? Unë do të thosha se ne jemi njësoj, apo jo? Ai është një lojtar shumë i mirë, ndoshta më i miri në NBA. Ai mund të jetë lojtari më i mirë. Ata thonë se ai është gjithashtu një fëmijë shumë i mirë.
Por me ndihmën tuaj ne do të mposhtim Kamala Harris dhe do ta bëjmë Amerikën përsëri të madhe”, tha Trump, duke injoruar me vetëdije ose pa vetëdije faktin se Antetokounmpo ka lindur në Greqi nga prindër nigerianë, është shtetas grek, flet greqisht dhe luan për Kombëtaren greke.
Nga ana e tij, kapiteni i Kombëtares greke të basketbollit u pyet për këtë çështje dhe u përgjigj diplomatikisht duke mbajtur distancën.
“Nuk i kam dëgjuar deklaratat e tij. Unë nuk e ndjek aq shumë politikën dhe nga ajo pak që bëj mundohem t’i mbaj mendimet e mia për veten dhe familjen time. Unë jam këtu për të luajtur basketboll dhe për t’iu përgjigjur pyetjeve të basketbollit. Të dy kandidatëve u uroj suksese”, tha Antetokounmpo.
Por, Barack Obama iu përgjigj ashpër kandidatit Republikan për komentin racist që bëri në lidhje me Giannis.
“Nëse jeni me ngjyrë ose latinë dhe mendonit se komuniteti juaj shpesh neglizhohet nga politikanët, përtej sezonit zgjedhor. Unë e kuptoj se si ndiheni. Por pse mendoni se përgjigja është të votoni për dikë që ka një histori të gjatë të minimit dhe shpërfilljes së komuniteteve tuaja, biznesi i të cilit u padit se nuk u dha më qira njerëzve si ju. Kush padyshim nuk mund ta kuptojë se një superstar i NBA mund të jetë i zi dhe grek. Që shprehet se çdo meksikan që kalon kufirin është kriminel dhe përdhunues.
Që përhap fantazi qesharake se njerëzit nga Haiti hanë kafshët shtëpiake të njerëzve të tjerë. Vetëm javën e kaluar ai organizoi një nga mbështetësit e tij që të tregonte shaka për zezakët që hanin shalqinj dhe se Puerto Riko ishte një ishull plehrash, në skenën në Madison Square Garden. A mendoni se ky është dikush që mund të kujdeset për ju?”, tha Obama.