Marrëdhëniet mes Partisë Demokratike dhe Lëvizjes Socialiste për Integrim duket se sa po vijnë e po bëhen më të ftohta. Edhe pse Basha dhe Kryemadhi e kanë cilësuar bashkëpunimin mes dy partive të tyre si një sukses që opozita ka ndërmarrë kundër qeverisë Rama, në të vërtetë një gjë e tillë nuk po rezulton kështu. Pas qëndrimeve që janë shfaqur nga ana e deputetëve të LSI si dhe strukturave të kësaj force kundrejt demokratëve, baza e PD ka rritur presionet ndaj Bashës duke rikërkuar sërish prishjen e bashkëpunimit me LSI-në. Situatat e ditëve të fundit si dhe qëndrimet e mbajtura nga ana e LSI, sidomos në këshillat bashkiakë, kanë shkaktuar pakënaqësi të madhe në radhët e demokratëve.
Rasti më i freskët është në Këshillin Bashkiak të Elbasanit, ku këshilltarët e LSI bashkuan votat me socialistët për miratimin e taksës së pronës. Kjo ka irrituar në maksimum jo vetëm demokratët e zonës, por dhe më gjerë.
Këto pakënaqësi demokratët nuk i kursyen t’i shprehnin as publikisht, pasi akuzuan partinë e Kryemadhit si një vegël të mazhorancës. Por krahas kësaj, pakënaqësi në radhët e demokratëve ka shfaqur edhe veprimi i dy këshilltarëve të LSI, të cilët pak kohë më parë bashkuan votat në Bashkinë e Gjirokastrës, për të shkarkuar kryetaren e këshillit, e cila ishte përzgjedhur si përfaqësuese e PD. Pikërisht këto veprime të ndërmarra nga ana e bazës së LSI, ka bërë që demokratët të risin presionet ndaj Bashës për tu distancuar sa më shpejt nga Lëvizja Socialiste për Integrim.
Baza kundër bashkëpunimit me LSI në zgjedhjet vendore
Qëndrimet e deputetëve të PD dhe funksionarëve të tjerë të saj sa i takon aleancës me LSI, kanë rritur pakënaqësitë në strukturat demokrate. Gazeta ka mësuar se krahas presionit që baza po ushtron ndaj Bashës në lidhje me aleancën me LSI, ajo ka rritur presionet edhe ndaj deputetëve demokratë.
Në kuadër të zgjedhjeve që Partia Demokratike ka ndërmarrë në nivel grupseksionesh dhe seksionesh, drejtuesit e PD nëpër baza si dhe anëtarë të shumtë, u kanë kërkuar deputetëve të PD që të reagojnë në lidhje me aleancën me LSI si dhe të ushtrojnë ndaj Bashës presion, për t’u distancuar nga Kryemadhi. Sipas tyre, bashkëpunimi me LSI ka ulur besueshmërinë tek demokratët si dhe tek shumë simpatizantë të kësaj partie pasi strukturat e LSI vijojnë të bashkëpunojnë me socialistët. Por krahas kësaj ata kanë shprehur rezerva edhe në lidhje me çështjen e zgjedhjeve lokale.
Baza e PD është shprehur kategorikisht kundër bashkëpunimit me LSI-në në këto zgjedhje, si dhe ka lëshuar mesazhe kërcënuese ndaj deputetëve demokrat se ata nuk do të votojnë asnjë kandidat që PD dhe LSI do të nxjerrin të përbashkët. Sakaq, demokratët përveç qëndrimit kundër bashkëpunimit me LSI-në, nuk kanë kursyer as “thumbat” për kreun demokrat Lulzim Bashën. Qëndrimet e mbajtura nga ana e Bashës, në lidhje me çështjen e aksionit opozitar, kanë ndikuar që baza demokrate të cilësojë kreun e PD, si një frikacak që po trembet nga kryeministri Rama.
Por në kuadër të kësaj deklarate, baza e PD ka bërë të qartë para deputetëve se nëse do vijohet me të njëjtën linjë, shumë demokratë mund të largohen nga partia. Kjo për faktin se sipas tyre, krijimi i një partie të re nga ana e ish-nënkryetarit të PD, Astrit Patozi do të largonte nga PD një numër të madh demokratësh, të cilët janë të pakënaqur me punën e Bashës. Largime që sipas tyre mund t’i shkaktojnë PD-së një tjetër disfatë në zgjedhjet e ardhshme./Endri ARIZI