Martin Henze, një personazh qesharak dhe mashtrues, që mediat e Berishës e paraqesin prej vitesh si këshilltar të Angela Merkel, është rikthyer në Shqipëri.
Këtë radhë për të mbajtur një fjalim poshtë ballkonit të Sali Berishës.
“Martin Henze, këshilltari për çështjet ekonomike pranë CDU-së gjermane dhe ish-këshilltar i Kancelares Merkel, mbajti një fjalim të fuqishëm në takimin e përnatshëm në “Rrugën e Shpresës.” Në fjalën e tij, Henze shprehu mbështetjen e tij për popullin shqiptar dhe opozitën, duke denoncuar regjimin e kryeministrit Edi Rama dhe paralajmëroi për rrezikun e kthimit të Shqipërisë në një shtet policor të kontrolluar nga korrupsioni dhe mafia.
Henze nënvizoi rëndësinë e lirisë dhe demokracisë për të ardhmen e vendit dhe kërkoi lirimin e menjëhershëm të liderit të opozitës, Sali Berisha”, shkruan portali i familjes Berisha.
Problemi është se Merkel ka kohë që është larguar nga pushteti dhe tani është mirë të thonë që është këshilltar i Scholz, se i japin më shumë rëndësi.
“Ne gjermanët nuk qëndrojmë në anën e një partie që erdhi në pushtet përmes zgjedhjeve të manipuluara nga Rama.
Jo, ne gjermanët qëndrojmë në anën e popullit të vuajtur shqiptar, në anën e opozitës shqiptare dhe të liderit të saj, Sali Berisha.
Autokracia shqiptare mund të shpenzojë aq shumë para sa të dojë, të bëjë donacione, të korruptojë politikanë në Gjermani, të organizojë foto dhe pjesëmarrje në evente partiake, por kjo nuk e ndihmon.
Shpirti që ngriti këtë vend, Shqipërinë, nga thellësitë e dëshpërimit në vitin 1991 dhe e ktheu në majat e shpresës në vitin 1992, zhvillimi i mirë në vitet që pasuan, e hodhi Shqipërinë në shekullin e 20-të, me besimin se – edhe gjatë ndjekjes së ëndrrave individuale – ju jeni familja shqiptare dhe që do të ngriheni apo bini së bashku si komb dhe si popull.
Sot, në vitin 2024, ju, populli shqiptar, duhet të kujtoni se – edhe pse rruga ka qenë e vështirë dhe udhëtimi juaj i gjatë – duhet të ngriheni përsëri si në vitin 1992, dhe të luftoni për të ardhmen e familjeve tuaja në Shqipëri.
Nuk duhet të ketë më refugjatë, por shqiptarët duhet të dëshirojnë të kthehen nga jashtë.
Për këtë, shqiptarët kanë nevojë për liri, demokraci, sundim të ligjit dhe rritje ekonomike, jo për autokracinë e Ramës.
Për këtë arsye, edhe kryetari i opozitës shqiptare, Sali Berisha, duhet të lirohet nga burgu, menjëherë. Nuk ka asnjë bazë ligjore për ta mbajtur atë të burgosur.
Zoti Rama, lironi Sali Berishën.
Ne të gjithë kemi mendimet tona. Ne të gjithë kemi bindjet tona të thella.
Dhe kur jetoni në kohë të vështira, kur si popull, si opozitë, si komb merrni vendime të mëdha, kjo domosdoshmërisht sjell pasion dhe përplasje mendimesh.
Kjo nuk do të ndryshojë dhe nuk duhet të ndryshojë.
Këto përplasje janë një shenjë e lirisë tuaj.
Mos harroni kurrë që në këtë moment, njerëz si ju, në vende të largëta, po rrezikojnë jetën e tyre për mundësinë e debatit për çështjet e rëndësishme, për mundësinë e votimit, siç e keni ju.
Ju nuk jeni vetëm, mos lejoni një puç kushtetues, kujtohuni për vitin 1992, ne gjermanët jemi me ju.
Ju e dini, thellë në zemrat tuaja: Mjaft është mjaft.
Ju e dini, thellë në zemrat tuaja: Më e mira është ende për Shqipërinë.
Faleminderit. Faleminderit. Shumë faleminderit. Rroftë Shqipëria”, u shpreh Henze.