Udhëheqësi suprem i Iranit Ayatollah Ali Khamenei paralajmëroi liderin e Hezbollahut, Hassan Nasrallah të largohej nga Libani disa ditë përpara se të vritej.
Lajmi është bërë publik nga agjencia e lajmeve Ruters e cila citon tre burime iraniane.
Në bazë të informacioneve të Reuters Irani tani është thellësisht i shqetësuar për infiltrimin izraelit në rangjet e larta të qeverisë në Teheran.
Menjëherë pas sulmit ndaj krerëve të Hezbollahut, Khamenei dërgoi një mesazh, me një të dërguar, duke i bërë thirrje Nasrallahut të largohej nga vendi, duke cituar raportet e inteligjencës pasi Izraeli kishte agjentë brenda Hezbollahut dhe planifikonte ta vriste atë, i tha Reuters një zyrtar i lartë iranian.
I dërguari, tha zyrtari, ishte një komandant i lartë i Gardës Revolucionare iraniane, gjeneral brigade i cili ishte me Nasrallah në bunkerin e tij kur u godit nga bombat izraelite dhe gjithashtu u vra.
Frika e Iranit për sigurinë e Khameneit dhe humbjen e besimit, si brenda Hezbollahut, ashtu edhe në Irani dhe mes tyre, u shfaqën në bisedat me 10 burime për këtë çështje, të cilët përshkruan një situatë që mund të komplikojë funksionimin efektiv të aleancës së Boshtit të Rezistencës të Iranit.
Vdekja e Nasrallah ka nxitur autoritetet iraniane të hetojnë tërësisht infiltrimin e mundshëm brenda radhëve të Iranit, nga Garda Revolucionare e fuqishme te zyrtarët e lartë të sigurisë, tha një zyrtar i dytë i lartë Iranian, citon Reuters. Ata janë veçanërisht të fokusuar tek ata që udhëtojnë jashtë vendit ose kanë të afërm që jetojnë jashtë Iranit, tha zyrtari i parë.
Teherani filloi të dyshonte për disa anëtarë të Gardës që kishin udhëtuar për në Liban, tha ai. Shqetësimet u ngritën kur njëri prej këtyre individëve filloi të pyeste për vendndodhjen e Nasrallah, veçanërisht duke pyetur për sa kohë ai do të qëndronte në vende specifike, shtoi zyrtari.
Zyrtari i dytë tha se vrasja ka përhapur mosbesim midis Teheranit dhe Hezbollahut, dhe brenda Hezbollahut.