Albin Kurti, është takuar me Kryeministrin e Greqisë, Kyriakos Mitsotakis, me të cilin ka diskutuar, ndër të tjera, për mënyrat për forcimin e lidhjeve diplomatike.
Lajmi është bërë i ditur nga Kurti, përmes një postimi në platformën X, të enjten, ku e konsideruar si “të mirë” takimin me homologun grek, i cili vazhdon që të mos e njoh pavarësinë e Kosovës.
“Diskutuam mënyrat për forcimin e lidhjeve diplomatike dhe ekonomike, të cilat kanë shënuar një rritje pozitive dhe të ndjeshme në tre vitet e gjysmë të fundit, veçanërisht duke u intensifikuar pas liberalizimit të vizave për qytetarët e Kosovës në janar të këtij viti”, shkroi kryeministri.
Gjithashtu, kreu i ekzekutivit bëri me dije se kanë folur edhe për zhvillimet në rajon dhe “domosdoshmërinë dhe perspektivën e tij për integrime evropiane dhe euroatlantike”.
Greqia, së bashku me Qipron, Rumaninë, Spanjën e Sllovakinë, përbën pesëshen e vendeve jonjohëse të pavarësisë së Kosovës që janë pjesë e Bashkimit Evropian.
Viteve të fundit ka pasur një lloj përafrimi të marrëdhënieve në mes të dy shteteve, mirëpo, ndonëse ishte paralajmëruar nga zyrtarët e Qeverisë së Kosovës, Greqia s’ka ndërmarrë asnjë hap për të ndryshuar qëndrimin e saj në raport me Kosovën.