Të premten, teksa Ervin Salianji kalonte orët e tij të fundit të lirisë në selinë e Partisë Demokratike, ekipi ligjor që e mbron nisën përpjekjet për mbajtjen e deputetit demokrat jashtë qelisë.
Përpara se Salianji të shkonte në Drejtorinë e Policisë së kryeqytetit për të ekzekutuar vullnetarisht vendimin e Apelit, avokatët e tij depozituan në Gjykatën e Tiranës një kërkesë për shtyrje të ekzekutimit të vendimit.
Në kërkesë avokatët pretendonin se zbatimi i vendimit do të sillte pasoja shumë të rënda për Ervin Salianjin, për shkak të cilësive të veçanta të tij si deputet. Ekzekutimi i menjëhershëm i vendimit të Apelit, theksohej në kërkesë, sjell përfundimin e mandatit të tij si dhe i pengon kandidimin në zgjedhjet parlamentare të vitit 2025, ku Salianji është caktuar drejtues politik i Partisë Demokratike për qarkun Elbasan.
“Në këtë kuptim, është e qartë se ekzekutimi i menjëhershëm i vendimit penal sjell pasoja shumë të rënda për të dënuarin, i cili përveç kufizimit të lirisë, sjell edhe ndërprerjen e menjëhershme të karrierës së tij politike dhe pengon vijimin e kësaj karriere pas kryerjes së dënimit”.
Sipas kërkesës, dërgimi në qeli i Salianjit sjell edhe ndërprerjen e përfaqësimit në Kuvend të qytetarëve të qarkut Korçë, që e kanë votuar në zgjedhjet e prillit 2021.
“Dënimi i një deputeti të Kuvendit të Shqipërisë në detyrë, e veçanërisht dënimi sepse ka kryer një denoncim publik në përmbushje të funksionit të tij si deputet i Partisë Demokratike dhe në ushtrim të lirisë së shprehjes të garantuar Kushtetuta e Konventa Evropiane për të Drejtat e Njeriut, përbën një rast të veçantë”.
Të njëjtin kërkim, shtyrjen e pezullim të ekzekutimit të vendimit të Apelit, avokatët do të depozitojnë edhe në Gjykatën e Lartë, gjykata e radhës ku pritet të zhvendoset beteja e Salianjit për të shfuqizuar dënimin e dhënë ndaj tij në dy shkallët më të ulëta.
Vendimi i formës së prerë për 1 vit burg ndaj Ervin Salianjit u ekzekutua vullnetarisht prej pasditen e së premtes. Në orën 17:30 ai mbërriti në Drejtorinë e Policisë Tiranë, prej nga ku, gati një orë më vonë u shoqërua drejt burgut të Fierit, ku do të vijojë vuajtjen e dënimit. (A2)