SPAK ka bërë gati letrat për të kërkuar arrestimin e ish-presidentit Ilir Meta. Burime bëjnë me dije se po shkon drejt përfundimit të hetimeve dosja e tij e “zezë” për korrupsion, pastrim parash, fshehje pasurie, mashtrim etj. Çështja është në fazën e fundit të hetimeve dhe pritet të shkoje drejt Gjykatës së Posaçme (GJKKO). Meta pritet që të njihet brenda pak javësh, për të mos thënë ditësh, me akuzën e pastrimit të parave.
ProfitSence Logo
Kjo është arsyeja e sulmeve të tij ndaj prokurorëve specialë. SPAK po bën modalitetet e fundit, pasi ish-presidenti ka dorëzuar në Prokurorinë e Posaçme kontestimet për hetimin e pasurisë që po i bën SPAK. Kallëzimet për Ilir Metën janë referuar në SPAK nga juristi Romeo Kara, ish deputeti Halit Valteti, avokati Idajet Beqiri dhe gazetari Adriatik Doçi, për disa episode korruptive.
Detajet
SPAK pritet të firmosë masën e sigurie arrest me burg për Ilir Metën, për çështjen CEZ-DIA, dosjen e lobimit dhe shërbimet estetike. Dosjen CEZ-DIA, për shkak të presionit të madh politik, e ka hetuar vetë prokurori i hekurt dhe i pakompromis, Altin Dumani, njeriu i besuar i amerikanëve. Thuhet se SPAK ka arritur te paratë e aferës CEZ-DIA, të cilat dyshohet se kanë përfunduar tek ish-LSI dhe xhepat e Ilir Metës. Ky i fundit pritet të akuzohet për korrupsion dhe pastrim parash.
Nga ana tjetër, prokurori Sotir Kllapi ka në duar dosjen e lobimit dhe shërbimet estetike. Nga Shtetet e Bashkuara të Amerikës dhe nga Qipro ka ardhur përgjigja zyrtare për letërporositë e SPAK-ut, ku konfirmohet se gjatë viteve 2016-2017, Ilir Meta ka shpenzuar qindra mijëra euro për lobim në SHBA, para këto që nuk u dihet burimi dhe që nuk janë deklaruar as në KQZ dhe as në ILDKPKI.
Meta mund të akuzohet për pastrim parash dhe falsifikim formularësh. Nga hetimet është provuar gjithashtu se Ilir Meta dhe Monika Kryemadhi kanë shpenzuar dhjetëra mijëra euro për dobësim dhe shërbime të tjera estetike në Vjenë dhe San Marino. Shpenzimet nuk janë deklaruar në ILDKPKI. Pra të tre dosjet kanë faktuar lëvizjen e parave.
Sa vite burg rrezikon Meta
Pas komunikimit të akuzave, Prokurorisë së Posaçme do t’i duhet të çojë në Gjykatën e Posaçme (GJKKO) vlefshmërinë e tyre shoqëruar edhe me kërkesën për masën e sigurisë ndaj Ilir Metës. Për këtë masë sigurie, kërkesa shtrënguese si ‘arrest me burg’, apo ‘arrest shtëpie’ kërkohet në rastet kur personi i akuzuar rrezikon që të prishë provat, apo dëmtojë hetimet përmes presionit, shantazheve apo blerjes së dëshmitarëve të mundshëm. Me të gjitha provat që po hetohen, Prokuroria e Posaçme nuk pritet që të kërkojë më pak se arrest me burg për Metën.
Për pastrimin e produkteve të veprës penale për Metën parashikohet 5-10 vite burg, ndërsa kur vepra kryhet në bashkëpunim dhe sjell pasoja të rënda siç është edhe rasti i tjetërsimit të ish-Kompleksit Sportiv Partizani, parashikohet një dënim jo më pak se 15 vjet me burgim. Ndërkohë, veç akuzave që lidhen me pastrimin e parave, që rrezikon Meta po hetohet edhe për falsifikim të dokumentacionit zyrtar, një falsifikim që nëse provohet nga Prokuroria e Posaçme është shtrirë edhe përgjatë pesë viteve që kreu i PL-së drejtoi Presidencën.
Akuza për falsifikim ka marrë shkas nga fakti që në të gjitha aktet zyrtare, edhe kur ishte President, ai ka firmosur si Ilir Meta, pra pa ‘J’-në fundore në mbiemër. Meta po hetohet nga SPAK për korrupsion pasiv parashikuar në nenin 259 të Kodit Penal, vepër e cila dënohet me burgim nga 3 deri në 8 vjet. Gjithashtu, Meta po hetohet edhe për falsifikimin e vulave, stampave ose formularëve, parashikuar në nenin 190/3 të Kodit Penal, vepër për të cilën parashikohet nga 3 deri në 7 vite burg. /Elmas Bogdani