Lojtarët e përfaqësueses tonë kanë pasur rritje të konsiderueshme të vlerës së tyre në treg dhe disa konsiderohen madje ndër më të shtrenjtët, sikurse është Hysaj me klauzolë lirimi 50 mln euro. Por ka dhe plot lojtarë të tjerë që janë në kërkim të skuadrës ideale për sezonin tjetër dhe janë duke pritur në këtë merkato vere ofertat nga klubet e ndryshme europiane. Në sezonin që lamë pas, një nga lojtarët që shkëlqeu me paraqitjen e tij është padyshim Thomas Strakosha, i cili bëri një sezon mjaft aktiv me Lacion dhe ishte një nga pikat e forta të klubit italian në edicionin e kaluare. Forma e mirë dhe performanca mjaft cilësore në statistika, ka bërë që klube të shumta të interesohen për të marrë shërbimet e Strakoshës, por më afër nga gjithë klubet e tjera është Liverpuli. Klubi anglez dëshiron ta largojë portierin e parë Karius, i cili zhgënjeu në finalen e madhe të Ligës së Kampioneve dhe për të sjellë Strakoshën janë gati të paguajnë 30 mln euro në arkat e Lacios. Pra, te Liverpuli janë optimistë se Thomas Strakosha do të jetë portieri i ri i “Reds”-ave. Madje, mediat pranë klubit legjendar anglez besojnë se marrëveshja për transferimin e gardianit shqiptar është fare pranë. Kjo edhe për faktin se Lacio ka gjetur zëvendësuesin e talentit kuqezi. Bardhekaltrit janë pranë mbylljes së marrëveshjes për portierin veteran të Olimpiakosit, Silvio Proto, me belgun që pritet të zbarkojë shumë shpejt në Romë. Ky transferim i lacialëve i hap rrugën transferimit të mundshëm të Strakoshës, vlera e të cilit është përcaktuar në 30 milionë euro. Kualitet dhe çmim i përballueshëm, të dy këto elementë i kanë bindur drejtuesit e Liverpul që të investojnë te 23-vjeçari. Me mundësinë e transferimit të Thomas Strakoshës që është mëse e mundur, “Reds” janë tërhequr nga gara për brazilianin Alison, për të cilin Roma pretendon mbi 70 milionë euro, por edhe për portierin e Milanit dhe përfaqësueses italiane, Xhanluigji Donaruma, për të cilin çmimi vlerësohet tepër i lartë. Marrëveshja me Lacion për Strakoshën do të ishte mjaft fitimprurëse për Liverpulin, që më në fund do të afronin një portier të ri në moshë dhe që jep garanci, por mbi të gjitha pa u detyruar të bëjnë shpenzime të çmendura në merkato. Megjithatë, finalistët e edicionit të kaluar në Champions janë të vetëdijshëm se duhet të nxitojnë për të mbyllur marrëveshjen, pas për kuqeziun interesohet edhe Bajer Leverkusen në Bundesligën gjermane, që kërkon zëvendësuesin e Bernd Leno që kaloi te Arsenali.
Qëndrimi/ Agolli komenton shortin në Champions League
Lojtarët shqiptarë që luajnë në Champions janë të paktë, një prej tyre është Ansi Agolli, i cili prej vitesh luan në nivele të larta me klubin azer të Karabagut. Ndërkohë, shorti i Ligës së Kampionëve, i hedhur në Nion të Zvicrës vuri përballë Kukësin me Valetën e Maltës, ku favorit shihen verilindorët për të kaluar në turin e dytë. Në turin e dytë, Kukësi do të përballet me fituesin e çiftit Olimpia Ljubljana-Karabak. Nëse Kukësi arrin ët kalojë në turin e dytë dhe njëkohësisht kalon edhe Karabaku, atëherë do të kishim një rikthim të ish-kapitenit të Kombëtares, Ansi Agolli për të luajtur në Shqipëri, duke qenë se ai aktivizohet me skuadrën azere. Në një lidhje telefonike për “Klan TV”, Agolli ka komentuar këtë short, duke qëndruar me këmbë në tokë për sa i përket kualifikimit për në turin e dytë. Një përballje të mundshme me Kukësin, Agolli e konsideron të veçantë për të personalisht. “E pamë shortin dhe mund të them se është një ndeshje e vështirë. Olimpia Ljubljana është një ekip me kualitet dhe futbolli në Slloveni është rritur shumë. Nuk mund të kalojmë në turin e dytë, pa kaluar fillimisht turin e parë ku do të luajmë me një skuadër kampione. Sa i përket ndeshjes me Kukësin, mund të them se është e veçantë për mua, pasi do të jetë hera e parë që do të luaj kundër një ekipi shqiptar në Kupat e Europës”, u shpreh Agolli./ Adriatik BALLA