Nikoll Lesi ka komentuar zërat, se Argita Berisha mund të marrë drejtimin e PD-së.
“Sali Berisha ndonëse mbahet fort dhe ka vota në radhët demokrate, përsëri nuk ështe e ardhmja e PD. Ai nga pak e përditë do mbetet e shkuara e kësaj force politike e cila bëri histori. Natyrisht që mbetet ikonë e selisë blu.
Por tashmë problemi nuk shtrohet në opozitë se kush bëri histori, por si do të rikthehen në pushtet, si do të jenë forcë politike konkuruese dhe bindëse në zgjedhjet e vitit 2025.
Në fakt Berisha duket sikur e ka hapur paksa krahun kur ka pranuar në lidership Gazment Bardhin dhe Agron Gjekmarkaj, të dy intelektualë që nuk janë servilë dhe kanë emrin e tyre. Por akoma Berisha nuk po fut marshin indietro që të hap udhë përfundimisht një lideri të ri.
E mira do të ishte që edhe në këto zgjedhje politike Berisha të jetë akoma lider, por që duhet deklaruar se nuk do të jetë më pas zgjedhjeve, as kryetar në PD dhe në asgjë politike. Kjo do të krijonte mundësinë e konkurimit të lirë të emrave që janë sot në drejtimin e fushatës në terren me demokratët.
Berisha e ka bërë historinë e tij, ndaj nuk ka nevojë më për një tjetër berishë në krye të PD, bile as edhe në PD. Me shumë se sa Sali Berisha që bëri histori nuk mund të bëjë e bija e tij, Argita Berisha-Malltezi, e cila për hir të së vertetës është një juriste e njohur dhe korrekte. Por nuk ka karizmën e babait të saj, Saliut.
Ditët e fundit u hodhën ide diversive se Argita Berisha do të marrë drejtimin e PD-së. Kjo e shkatërron aksionin opozitar dhe e krijon klane e grupime brenda PD e cila me njëmijë halle u bashkua, pas një lufte të gjatë, edhe me dajak, brenda selisë së PD.
Analistë të njohur janë pozicionuar hapur kundër marrjes së PD-së nga Argita Malltezi-Berisha. Blendi Fevziu thotë se e konsideron Argita Malltezin të zgjuar dhe të aftë, por një prej mangësive që ka, është pak njeri i tërhequr.
“Njerëzit që vijnë në lidership, duhet të jenë më popullorë, alegër. Ju e dini si takohet Sali Berisha me çdo njeri. E kam thënë edhe për Bashën, mungesa e komunikimit me shoqërinë mbetet një e metë e madhe e tij.
Te opozita nuk është problemi vetëm kë do të vendosë Berisha. Nuk flasim për dyqan, por për parti politike”, tha Fevziu.
Në vijim, gazetari solli në vëmendje një deklaratë të kohëve më parë lidhur me atë se çfarë mund të ndodhë me Partinë Demokratike nëse ndodh që familja e Berishës merr selinë blu.
“E ka thënë Aurel Plasari që PD mund të mbyllë qepenin”, thotë duke qeshur Fevziu.
Ndaj nëse duan ta mbyllin, ta shkatërrojnë prapë dhe përfundimisht le ta mbajë familja e Berishës çelësin e selisë blu!
Demokratët duan rikthimin në pushtet, ata nuk kthehen më me mbiemrin Berisha pas zgjedhjeve të vitit 2025, zgjedhje të cilat nuk ka shanse t’i fitojë PD-ja.
Ndaj hapeni lojën dhe mos e prishni këtë forcë politike”, shkruan ai në gazetën e tij.