Ish deputeti demokrat Myslym Murrizi duke komentuar konkluzionet e kreut të SPAK Albert Dumani para deputetëve të komisionit parlamentar të sigurisë, lidhur me operacionin e fundit ndaj krimit të organizuar, tha se ai teknikisht ka bërë katër gafa.
Sipas zotit Murrizi zoti Dumani gaboi kur tha se gjyqtarët duhet të vendosin çfarë kërkojnë prokurorët. “Ne nuk jemi republikë prokurorësh” tha ai.
Një tjetër gabim sipas tij ishte se kreu i SPAK kërkoi zgjatje mandati, çka tregon frikën e zotit Dumani, të cilit i mbaron mandati në fund të vitit.
Më tej zoti Murrizi vlerësoi akuzat e zotit Dumani mbi kreret e policisë, se ata janë të inkriminuar. Ai nuk mund të flasi si analist, tha zoti Murrizi. Policia nuk mund të bëhet e gjitha pis, tha ish deputeti i PD, ndërsa paraqiti dhe rezervat e tij. “Nëse i kanë dalë emrat në hetim, Dumani mund ti arrestojë” tha ai.
Lidhur me operacionin e fundit të SPAK zoti Murrizi tha se Dumani nuk duhet ta shesi si meritë të prokurorëve të kohës së komunizmit. “Operacioni i fundit ka ardhur i servirur në pjatë nga shërbimet e huaja” tha ai.