Aktivistja Evi Kokalari u shfaq për herë të parë në politikën shqiptare gjatë kohës së Foltores së Sali Berishës.
Por, pas disa kohësh aktivizimi në PD ajo vendosi të rikthehej në Shtetet e Bashkuara të Amerikës pas zhgënjimit nga ish-kryeministri i PD, aleancat që ai krijoi me Ilir Metën dhe sulmet që mori nga mediat pranë tij. Kokalari vazhdon të denoncojë se Partia Socialiste dhe grupi i Sali Berishës, i quajtur ndryshe “Rithemelimi” vazhdojnë pazaret me Partinë Socialiste.
Madje sipas saj, zgjedhjet vendore të 2023 u shitën nga opozita. Ajo akuzon drejtpërdrejt Sali Berishën, Shkëlzen Berishën dhe gazetarin Çim Peka se e kanë sulmuar në fshehtësi për ta bërë që të largohej nga politika shqiptare, sidomos kur hapi partinë e saj.
Madje gjatë kësaj kohe Evi Kokalari ka thënë se Sali Berisha e bëri luftën e tij dy vjeçare, jo për dinjitetin e tij apo për PD, por për të shpëtuar veten fëmijët e tij nga drejtësia. Reagimet e Kokalarit në rrjetet sociale kanë ardhur pas përplasjeve të fundit me gazetarin Ylli Rakipi dhe Çim Peka në lidhje me deklaratën e Rakipit që trazoi ujërat e politikës duke ndezur “luftën” e medieve me njëra-tjetrën.
Z.Rakipi tregoi se si një natë në një restorant në periferi të Tiranës kishte gjetur së bashku, Erion Veliajn me Shkëlzen Berishën dhe drejtuesin e SYRI Tv, Çim Pekën. Deklarata u bë lajm viral veçanërisht për faktin se për 5 javë “Rithemelimi” po organizon protesta përpara bashkisë, duke akuzuar Veliajn për korrupsion të madh dhe njëkohësisht duke i kërkuar dorëheqjen. Gazetari Çim Peka shkoi deri aty sa akuzoi se televizioni MCN ku ka emisionin Rakipi, ka marrë miliona euro nga qeveria Rama dhe mashtrimi i drejtuesit të “Të Paekspozuarit”, është bërë në funksion të një shërbimi ndaj Ramës.
Lidhur me këto zhvillime, Kokalari thotë se tani ata do të hanë kokat e njëri-tjetrit. “Çim Peka – meqë e akuzon Ylli Pobickën për dëshmi të rreme dhe mund te jete sepse Rakipi me ka rezultuar super mediokër, i korruptuar dhe hipokrit, por ndërkohë, më thuaj, atë sulmin ndaj meje herën e fundit që më kishte në emision, kush e shtyu? Ju të Berishës apo Ilir Meta?
Po komentin se unë doja të merresha me politikë në Shqipëri se kisha ndërmend ‘korrupsion të ardhshëm’, kush e përgatiti për këtë? Kam idenë o ti, o Shkëlzeni? Se helbete s’më kapni dot për korrupsion aktual apo te shkuar, dhe filloni fantazi për korrupsion të ardhshëm! Në fakt, Rakipi fenë ju ka luajtur. Me vjen mirë të shoh që të gjithë po hani kokat e njëri-tjetrit. Kokoshkat gati i kam!”, thotë Kokalari.
Sulmi ndaj Berishës
Po ashtu, Kokalari akuzon se pas puçit që u thur ndaj saj ka dorë edhe Sali Berisha. Ajo thotë se gjithë sulmet ndaj saj erdhën pasi demaskoi hapur pazaret ku ata janë zhytur. “Ja të shtoj dhe dy fjale për ata që japin mend se gënjen Rakipi kur tha që pa Shkëlzenin në tavolinë; -E para, ndava një lajm të medias, dhe i kërkova Shkëlzenit ta hedhë në gjyq nëse Rakipi gënjen. Ama, moral mos na bëni, sepse jam akuzuar pa fund qe me kishte blerë Erion Veliaj, thjesht se kam folur hapur për pazaret që këta të Rithemelimit po bënin e që Veliajt i vunë Këlliçin kundërshtar. Dhe t’ju them të drejtën, këto thashetheme nga këta të Syrit dolën, sepse gazetaret që më akuzuan mua vetëm nga strategun e Hasit mund ta kishin marrë një gënjeshtër të tillë.
Dhe mbi te gjitha, Sali Berisha as nuk e denoncoi veprimin e Adriana Kalasë, e cila shpërndau një foto fallco sikur kisha dale me Veliajn, madje e justifikoi duke thënë ‘është fjala e lirë, nuk ndërhyj dot’ kur pikërisht Rakipi e pyeti në studio si mund ta lejojnë diçka të tillë.
Kështu që, ju mbështetësit e Foltores, nuk di se çfarë ju bën të ndjeheni sikur keni të drejtë të jepni mend, por seriozisht kam një neveri për dinjitetin që ju mungon, dhe trajtimin ndaj meje kur kam ngritur zëri për padrejtësi që u janë bërë pikërisht juve. Pra – shkoni qurravituni diku tjetër dhe mos bëni më moral me mua, sepse moral nuk keni!”, tha Kokalari ndër të tjera./Sot