The Economist” ka krijuar një sistem statistikash për të kuptuar se çfarë e bën një shtet më të aftë se të tjerët në futboll.
Një nga faktorët që ndikon shumë, është se sa lojtarë ka vendi në total. Sa më shumë lojtarë, aq më shumë talente prej të cilëve të zgjedhësh. Këtu mbizotëron Gjermania, ku Federata Gjermane e Futbollit ka rreth 6.6 milionë anëtarë të regjistruar, në 26,000 klube. Në total Gjermania ka 16 milionë lojtarë futbolli, sipas FIFA-s. E fundit renditet Islanda, me 32,000.
Por pikërisht Islanda ka treguar se vetëm ky numër nuk mjafton. Një tjetër faktor është popullariteti i sportit. Numri i kërkimeve në Google për kokë, kërkime që kanë lidhje me futbollin, tregon më me saktësi se në cilat vende futbolli është më popullor. Këtu mbizotërojnë vendet afrikane. India dhe Pakistani renditen të fundit.
Faktori tjetër, paraja e përdorur për sportin. Sa më shumë parà të ketë një vend për të shpenzuar mbi stadiume e trajnerë, aq më të mëdha janë gjasat që të fitojnë botërorin. Këtu kryesojnë Gjermania, Zvicra dhe Anglia, të paktën për vitin 2018.
Megjithatë, ky sistem ka disa përjashtime. Kroacia, Bregu i Fildishtë dhe Uruguaji dalin kundër të dhënave që u paraqitën më lart. Si Kroacia, ashtu dhe Uruguaji, kanë popullsi të vogël, ndërsa Bregu i Fildishtë nuk është vend i pasur. Atëherë, çfarë i bën aq të mirë në futboll?
Së pari, të tria këto vende i nxitin futbollistët që të jenë kreativë. Së dyti, rrjetet e gjurmuesve të talenteve janë shumë aktivë me të rinjtë. Së treti, fitojnë përvojë nga futbolli ndërkombëtar duke pasur lojtarë nga vendi i tyre që luajnë me klubet më të famshme evropiane, me menaxherët më të mirë.
Atëherë, kush ka më shumë gjasa ta fitojë botërorin? Katër vite pasi u ndëshkuan rëndë nga Gjermania, the Economist mendon se Brazili ka më shumë gjasa të fitojë. Brazili ka 27% mundësi për të fituar kupën, sipas The Economist.
