Dita e sotme është dita vendimtare pas një fushate të ndezur elektorale për të mësuar se cili do të drejtojë institucionin qeverisës të futbollit shqiptar për 4 vitet e ardhshme. Në orën 9.00 në Hotel Adriatik, në Durrës, zhvillon punimet Asambleja Zgjedhore e Federatës Shqiptare të Futbollit. Në këtë garë që pritet të jetë shumë e fortë dy janë rivalët krysorë Armand Duka e Bashkim Fino.
Presidenti aktual, Armand Duka, kërkon një mandat të pestë, duke u bazuar sipas tij në progresin e futbollit shqiptar nën drejtimin e tij. Nga ana tjetër sfidanti kryesor Bashkim Fino, një emër me mjaft peshë në arenën politike shqiptare, premton ndryshimin pas akuzave të forta ndaj drejtimit aktual dhe publikimit të shumë skandale financiare e shkeljeve ligjore nga ana e Dukës.
Në garë është edhe Shpëtim Hala, ish-gjyqtar, edhe pse me një kandidaturë që nuk ka patur rezonancë të fortë mediatike. Gara pritet të jetë shumë e fortë, pasi ende shumë klube të futbollit janë në pronësi të bashkive, që në shumicën e tyre janë të majta. Në këto bazohet kandidati Fino për të përmbysur hegjemoninë e Dukës. Ky I fundit po përdor gjithë aparatin e FSHF-së si dhe lidhjet që ka krijuar gjithë këto vite në krye të federatës për të mbajtur postin edhe për katër vite të tjerë.
Sa vota duhen
Sipas statutit të FSHF-së me parimin një anëtar një votë, 66 anëtarët e Asamblesë Zgjedhore do të vendosin me votën e tyre se cili do të jetë presidenti i ardhshëm. Statuti përcakton qartë se për t’u zgjedhur president kandidati ka nevojë për 2/3 e votave të vlefshme, dhe nisur nga shifra e 66 anëtarëve me të drejtë vote do të thotë se duhen 44 vota.
Në rast se asnjë prej kandidatëve nuk arrin të sigurojë këtë shumicë të përcaktuar, atëherë zhvillohet një raund i dytë midis dy kandidatëve që kanë marrë më shumë vota në raundin e parë. Këtu kandidati që fiton me shumicë të thjeshtë, 50% plus 1 të votave zgjidhet president. Në rast se dalin barazim, atëherë do të jetë shorti që do të përcaktojë fituesin.
Kush voton sipas statutit
Sipas Statusit të FSHF-së Asambleja e Përgjithshme është organi më i lartë legjislativ i Federatës Shqiptare të Futbolli dhe përbëhet nga 66 anëtarë me të drejtë vote. 54 janë klube sportive të gjithë kategorive të futbollit dhe 12 janë shoqata, prej të cilave 8 janë shoqata rajonale, 3 janë shoqata që kanë lidhje direkte me aktivitetin si: Shoqata e Arbitrave, Shoqata e Trajnerëve dhe Shoqata e mjekeve sportive, ndërsa 1 është Shoqata e Futsallit.
Komiteti Ekzekutiv
Shumë të rëndësishme janë edhe zgjedhjet për anëtarët e Komitetit Ekzekutiv, që përbëhet nga 11 persona, presidenti, dy zëvendëspresidentë dhe 8 anëtarë, ndërkohë që Presidenti i Shoqatës së Arbitrave zgjidhet automatikisht anëtar i Komitetit Ekzekutiv. 23 janë kandidaturat që garojnë për vendet në organin më të lartë kolegjial që drejton dhe merr vendime mes periudhave të dy asambleve.
Asambleja e Përgjithshmë Zgjedhore e FSHF-së pritet të jetë një mbledhje e gjatë dhe me interes të jashtëzakonshëm, të cilën do të mund ta ndiqni duke nisur nga ora 9.00 drejtpërdrejt në Report TV.
d.c./shqiptarja.com