Bashkimi Evropian ka vënë në zbatim planin për të shfarosur korrupsionin në politikën shqiptare. Ditën e djeshme në ambientet e Pallatit të Kongreseve u prezantua misioni Euralius V, i cili do të ketë si synim kryesor asistencën dhe ngritjen sa më shpejtë dhe funksionimin e KLP, KLGJ, SPAK, Byrosë së Hetimit dhe organeve të tjera të sistemit të drejtësisë.
Misioni aktual Euralius përfundoi mandatin e tij dhe tashmë në vendin tonë kanë mbërritur ekspertët e rinj që do të kenë në fokus zbatiin e reformës në drejtësi. Tani që shumica e ligjeve u miratuan, në fokus të ekspertëve do të jetë eleminimi i korrupsionit.
Sa i takon ekspertëve, janë 89 të tillë dhe secili do të ketë detyra specifike. Një prej tyre do të asistojë Ministrinë e Drejtësisë dhe Parlamentin, dy ekspertë të tjerë do të jenë përgjegjës për ngritjen e KLP dhe KLGJ, Inspektoriatit të Lartë të Drejtësisë dhe KED. Po ashtu do të jenë përgjegjës për zhvillimin e karrierës së gjykatësve dhe prokurorëve si dhe hetimet disiplinore ndaj tyre. Një ekspert tjetër do të ketë në fokus luftën antikorrupsion. Ai do të asistojë në ngritjen e SPAK dhe Byrosë së hetimit. Një tjetër ekspert i përket fushës së teknologjisë. Pjesë e grupit është një ekspert që do të mbështesë shkollën e magjistraturës dhe do të merret me trajtimin e stafeve të gjykatave dhe prokurorive. Ekspertët e fundit i përkasin çështjeve civiole dhe ekonomike.