Nga Anri Bala
E di që jeni të mërzitur… sepse haka nuk po shkon tek i zoti dhe që jeni të paduruar për t’i parë nën tehun e “gijotinës”, të gjithë autorët e vuajtieve tuaja, por na duhet të bëjmë pak durim. Nuk kemi pse mërzitemi, as për Kos dhe as për Llalla… kur i kemi rrugët plot mbushur me rrumpalla!
E nëse e kishit menduar se do ishte e lehtë, që mjafton t’i ulnim në bangën e të akuzuarit… me keqardhje ju them se e keni gabim. A pritëm vallë të arrestohej Llalla… aspak?! Pritëm nën ethe, me shpresë, se mos ndoshta kësaj here do të niste vërtetë drejtësia.
Edhe kriminelët e llojit të tyre, për tu mbrojtur bëhen bashkë kundër drejtësisë, tamam si një organizatë mafioze janë të gatshëm të bëjnë gjithçka: shkruajnë dhe ndryshojnë ligje, ndikojnë që të argumentohen në favor të tyre, japin haraç dhe plaçkë, vetëm të shmangin atë që i ka hapur dyert dhe po i pret… burgun.
Por, nuk duhet të dëshpërohemi, sepse as për “Kosin dhe as për Llallën”, nuk ka mbaruar procesi! Edhe pse i shpëtoi “skanerit” të pastëritisë së figurës, për të, “SPAK” nuk ka nevojë të bëjë analizë fare, e ka të dokumentuar, e këtë e di fare mirë. E ç’do të na thoshte vettingu, që ne nuk e dinim… se ka plaçkitur prona e ka shitur drejtësinë, duke e bërë mall pazari për kriminelët dhe fatkeqësi të atyre që u ra për hise ta provojnë në kurriz?! Ç’do na thonë ndonjë të re… asgjë për të na habitur, qysh kur kujtojmë se si një barkbosh, pa punë dhe pa profesion, vetëm duke u kthyer në një shërbëtor të politikanëve “të ndershëm”, u bë edhe ai sheik… si ata.
Për rastin në fjalë është bërë një herë vettingu, qysh kur Llalla i Kosit, urdhëroi të gjithë familjen, të mos dilnin më në foto… si të pasur! Kurse fundi i Llallës tonë, është si ajo historia kur një i papunë mendoi të bëntë para si hajdut dhe i kërkoi një mikut të tij “profesionist”, ta fuste në punë. Gjëja e parë që pyeti hajduti ishte: “A je gati të vjedhim? “Po jam”, i’u përgjigj me zell ai! Po, a di ta fshehësh atë që do vjedhim? “Jo”, i tha ai, me të drejtë. Epo atëherë gjej ndonjë punë tjetër, se kjo nuk bënë për ty! Llalla jonë dinte vetëm të vidhte, por nuk mësoi kurrë të fshihte, jo për neglizhencë, por nuk e besonte, se do të vinte dita që duhet ta praktikonte mësimin: “Fshehja” e plaçkës së vjedhur.
Në të vërtetë, nuk është Llalla por Kosi që prodhon llallën që më shqetëson! Janë ata hajdutët, që dinë të fshehin “plaçkën”, të vënë për gjithë këto vite në kurrizin tonë. Ky model, nuk ka as frikë nga forca e ligjit, ndaj hidhet e kapardiset me karshillëkun e fodullit, se atij, askush s’ka çfarë i bënë! Ndaj mendoj, se duhet ta nisim nga ky i pari… tek Kosi , e pastaj me radhë deri tek i fundi, Llalla!
Llalla i Kosit, nuk diti ta fshihte plaçkën, ndaj herët a vonë, me hirë apo me pahirë, do të përballet me drejtësinë, që sa do e pafuqishme dhe delikate të jetë, ai i ka njollat kudo, të materializuara dhe të deklaruara nga padia dhe nga dëshira për madhështi e fshatarit, që kapi majat duke e shtyrë të tjerët nga prapanica.
Problemi jonë janë Rrumpallat, “shtyrësit” e Llallës dhe shokëve të tij, që po bëjnë “pallë” duke u gëzuar dhe i gëzuar të gjitha ato që i kanë… e që askush nuk mund të thotë se i kanë. Vjedhësit e pasurive kombëtare, si troje, miniera, male, lumenjë, liqene deri gurë dhe murë, që shtyjnë të tjerët të punojnë për ta, për të mos lënë njolla krimi dhe abuzimi, duke u kthyer në mjeshtara të “maskimit”.
Ata që po bëjnë kërdin me çoroditjen tonë, që herë pas here na hedhin ndonjë gur të zi në lum, për të na vënë në garë, se kush do e nxjerrë i pari, kur gjithë lumi është mbushur me gurë të zinj, e ne na zë gjumi në breg të tij… nga lodhja.
Ndaj, mjaft u shqetësuat për Llallën dhe shokët e tij, të cilët do paguajnë?! Pyesni çdo ditë, a do paguajnë autorët e vërtetë, ata më të rrezikshmit, që kanë hipur dhe zbritur majat e pushteteve dhe kurrë nuk ndalojnë së ngjituri majave të pasurisë, të cilët i kanë krijuar kushtet, që si vrasës, të dënohen… për moskallzim krimi?!/Ekskluzive.al