Lulëzime Duka, ikona e brezit të artë të Dinamos dhe Kombëtares kuqezi të femrave, do të shpërblehet për sakrificat dhe kontributin e saj në sport me anë të pensionit të posaçëm të miratuar nga qeveria për figurat më të spikatura të Shqipërisë.
E ftuar në “Good Morning Albanians” ajo ka treguar disa nga sakrificat që ajo ka bërë për sportin e volejbollit, një prej të cilave ishte se në ditën që u bë nuse, e zhveshi vellon dhe shkoi për të luajtur në vendin e parë në Shkodër.
“Unë kam lënë dasmën. Jam zhveshur nga nuse, nga shkuar kam luajtur në Shkodër dhe kam ardhur prap dhe kam gjetur dasmorët duke kërcyer. Jam veshur dhe kam vazhduar ceremoninë. Kam bërë sakrifica për sportin. Këtë u them edhe vajzave që të bëni diçka duhet të sakrifikoni”, tha ajo.
Ajo ka treguar gjithashtu se për shkak të angazhimeve të saj me sportin e volejbollit, kanë qenë nëna dhe babai ata që i kanë rritur djalin.
“E kam lënë 3 javësh djalin dhe kam dalë në fushë. Ai nuk më njihte për nënë, e kam lënë djalin 2 vjeç dhe kam shkuar në Siri, kemi dalë kampion mesdheu. Nuk ma ndiente mungesën, se ma ka rritur mamaja dhe babai”-ka treguar Lulëzime Duka.