Ballkani ka reaguar pas vendimit të UEFA-s që ky klub, ndeshjen ndaj Plzenit mos ta luajë në “Fadil Vokrri” por në “Air Albania”.
Klubi nga Suhareka tha se aty ku shqiptarët e bashkuar me kombëtaren e Shqipërisë shënuan rezultat historik në kualifikimet për “Euro 2024, të enjten do të zbres kampioni i Kosovës, që po ashtu tash e disa vite, sipas tyre, ka bërë bashkë futbollistët nga të gjitha trevat shqiptare.
“FC Ballkani ndeshjen më të rëndësishme të deritanishme në UECL, do ta zhvillojë në stadiumin “Air Albania” në Tiranë, si nikoqir i Viktoria Plzen”.
“Skuadra jonë që po ndërton në vazhdimësi rezultate historike në nivel të klubeve, çdo herë është mbështetur nga tifozët e të gjitha viseve shqiptare. Andaj ky duel evropian, është edhe një mundësi për të qenë përsëri krahë njëri-tjetrit në stadiumin ikonik, në kërkim të një suksesi të radhës me përmasa evropiane”, thuhet në reagimin e Ballkanit, transmeton Klankosova.tv.
Kujtojmë se UEFA e ka detyruar Ballkanin që ndeshjen ndaj Plzenit ta luajë në “Air Albania”, pasi “Fadil Vokrri” s’i plotëson kriteret, si shkak i dëmtimeve të fushës pas ndeshjeve të fundit.
“Le të dëgjojë gjithë bota mbarë, kështu rri bashkë, gjithë populli shqiptar”, thuhet në fund të reagimit të Ballkanit.