Aktori shqiptar nga Shkodra Marko Caka, prej disa vitesh jeton larg Shqipërisë dhe fillimet e tij në televizion i kishte në shtetin fqinj, Greqi.
Ai ishte gazetar dhe gjatë periudhës që punonte atje u mundua të promovonte edhe artistët shqiptarë. Por mesa duket qëllimi i tij ishte Hollywoodi-i dhe brenda 3 viteve ai ka arritur të realizojë disa role të suksesshme në industrinë kinematografike më të madhe në botë.
Ai ka arritur të realizojë plot 85 produksione kinematografike e televizive dhe për “tvklan.al” ai ka treguar me detaje eksperiencat e tij në Hollywood.
Marko ka treguar se gjithçka ka filluar nga një rastësi e bukur kur u takua me aktoren e famshme Cameron Diaz gjatë promovimit të librit të saj ku ai ishte i pranishëm si gazetar.
“Nuk e kisha menduar kurrë se ishte aq e thjeshtë dhe e çiltër. Gjatë takimit ajo më dha 2-3 sugjerime dhe aty nisën shkëndijat e para ku unë nisa të jap performancën time në industrinë e filmit. Ajo ishte promotorja e parë”- tha Caka.
Gjithashtu ai tregoi se kishte marrë pjesë në disa sheshxhirime si tek “Fast &Furious” dhe “The Rock” . Ai foli edhe për pagesat që mund të fitojë një figurant në filmat e Hollywood-it.
“Paga e një figuranti është 200 deri në 300 dollarë dita, në varësi të orareve. Nëse ke një rol me një skenë të vogël dialogu, fillon nga 1.000 dollarë dita dhe më pas 970 dollarë për çdo fjali”- tregoi aktori Marko Caka.
Ndër të tjera 47 – vjeçari tha se kishte humbur një rol në serialin “The Deuce” të James Franco me rrjetin prestigjoz të produksionit HBO për arsye personale.
“Ka qenë një rol me skena homoseksualiteti të viteve 1970. Nga karakteri artistik mund të ishte një hap shumë i mirë në karrierë. Por ishte pak e sikletshme sepse nuk mund të ndërtosh një karakter nëse nuk është në prirjet e tua. M’u duk shumë e sikletshme”- u shpreh aktori 47- vjeçar.
