Një prej gazetarëve të njohur të medias “Onet” në Poloni ka zgjedhur që të vijë në Shqipëri për të bërë një artikull rreth Ernest Muçit.
Fillimisht ishte testimi për të bërë provën sesa i njohur do të rezultonte Muçi në vendin tonë. Rezultatet ishin paksa befasuese për polakun, veçanërisht në personat e parë të pyetur, askush nuk e njihte lojtarin që po shkëlqen te Legia e Varshavës. Më poshtë mund të ndiqni edhe një pjesë të këtij shkrimi të veçantë.
“Me çfarë e lidhin polakët Shqipërinë? Brezi i vjetër, të paktën disa prej tyre, ndoshta e kujtojnë mirë Enver Hoxhën. Gjatë vizitës time në Shqipëri, vendosa që të bëj një test nëe e njihnin heroin e tyre, Ernest Muçin. U përpoqa të bëja një provë të vogël dhe e nisa nga aeroporti.
Një i ri po shiste sanduice dhe e pyeta: “Ernest Muçi?”. Por përgjigje ishte negative: “Jo nuk e di fare”. As shoferi dhe as disa pasagjerë rrugës nuk e njihnin asin e Legias së Varshavës. E çuditshme, mendova, sepse siç kisha lexuar më parë, e quanin si “fëmija i mrekullisë”. Pra si dreqin është e mundur, askush nuk e njeh këtë lojtar fantastik?.
Mbërrita pranë stadiumit të KF Tirana. Këtu, mendoj, duhet të jetë ë mirë. Megjithatë, afrohem me tre persona të tjerë dhe ende asgjë, askush nuk e njihte. Më në fund, një djalë dhe një vajzë i përgjigjen emrit të Muçit. Ndonjëherë mendoja se shqiptarët ishin si milingonat që nuk flenë kurrë. 7/24, pothuajse gjithçka ishte hapur, të gjithë duan të ndihmojnë, të fitojnë para, të gjithë duan që të jenë më mirë. Muci e di këtë dhe ndoshta mund ta përdorë që ta kthejë në diçka të madhe, shumë më të madhe se Legia”, shkruhet në artikull.