Ish-kryeministri Sali Berisha, duket se po përgatitet për të çuar vendin drejt trazirave. Disa nga deputetët e Sali Berishës dhe Gazment Bardhit kanë dhënë sinjale se seanca e Kuvendit që do të mbahet të hënën do të shoqërohet me tensione të forta. Mesazhet e forta i kanë dhënë pikërisht ata deputetë që janë të përjashtuar nga seanca për shkak se në seancën e fundit më 18 tetor, “non grata” dhe të gjithë mbështetësit e tij uzurpuan sallën, dhe përmbysën karriget e ministrave. Ardhja e tyre duke shkelur rregullat, pritet të sjellë të hënën përplasje të forta me
Berisha paralajmëron: Do jemi në seancë
Dje ish-kryeministri Sali Berisha ka deklaruar se Parlamentin nuk do e braktisin dhe do të jenë në seancën e së hënës pavarësisht se ai dhe 22 deputetë të tjerë u përjashtuan nga Komisioni i Etikës. Berisha tha i vendosur se parlamentin nuk do ta braktisin.“Do të shkojmë në seancë, do jeni aty dhe çfarë qëndrimesh do mbajmë. Parlamentin nuk e braktisim, do të donim që të iknim por absolutisht jo”, tha Berisha. Sa i përket aksionit opozitar, Berisha paralajmëroi se “do të jetë uragan” dhe do të jetë i bashkërenduar me Partinë e Lirisë.
Baçi: Në 30 tetor më takon të futem në Parlament
Nga ana tjetër, edhe deputeti i PD Luan Baçi, dje gjatë një interviste televizive nuk e ka përjashtuar mundësinë për të bllokuar seancën plenare që do të zhvillohet të hënën.“Më solle në një pikë që doja të diskutoja. Do shkojmë më datë 30 në Parlament. Unë me llogaritë që bëj, pavarësisht se përjashtimi është i padrejtë. Në 30 tetor më takon të futem në parlament, do shkoj, nëse garda më ndalon do ndalem se s’kam ndërmend të bëj luftë me gardën. Demokratët dhe PD po përdor Berishën, sepse është lideri ynë me reputacion. PD po shpëton duke pasur në krye Berishën, sepse përndryshe do ishim shkërmoqur”, tha ai. Ai shprehet i bindur se do të marrin edhe mbështetjen e Gaz Bardhit dhe mbështetësve të tij.“Besoj se do kemi mbështetje të zotit Bardhi. Qëndrimi që ka Bardhi është qëndrim i drejtë. Nuk jemi kundër hetimit, ne jemi për zbatim të procedurës. Të vazhdojë hetimi për këdo deputet të opozitës”, tha ai. Masën “detyrim paraqitje” dhe ndalim të daljes jashtë vendit për Berishën, Baçi e quan një goditje me regji. “Kjo nuk është goditja e parë për Berishën. Nuk është goditje për Berishën por për opozitën. Ne ndaj rezistojmë që të mos shkelet kushtetuta që SPAK pastaj të mos bëjë gjueti shtrigash. Kur kërkon të kufizojë dhe të heqë lirinë e një deputeti që e mbron kushtetuta direkt, atëherë çfarë pret. Patjetër që reagimi kështu do të jetë kur i shkelet të drejtat. Për të shfokusuar vëmendjen nga aksioni i opozitës nxorën urdhrin e SPAK. Dhëndrin e Berishës mund ta thërriste SPAK me telefon që të aparaqitej aty. Por e arrestuan në Rinas, e dërguan në mendje”, tha ai.
Korreshi: Ne do të jemi në seancë!
Gjithashtu edhe deputeti i PD-së, Saimir Korreshi, deklaroi dje se mazhoranca i përjashtoi 23 deputetë të opozitës por ata do të jenë në Kuvend në seancën e 30 tetorit. “Mazhorancë që di të vjedhë, por nuk di të numërojë. Nuk ka më qesharakë se këta. I tremben opozitës prandaj dhe na përjashtojnë dhe kur nuk u dalin llogaritë, nuk zbatojne as vendimet e tyre. Përjashtimi 10 ditë i deputetëve ka hyre ne fuqi me 20.10.2023 dhe me logjikë normale përfundon në datën 29.10.2023… 20, 21, 22, 23, 24, 25,26, 27, 28, 29= 10 ditë. Ky është turpi i dytë pas atij të përjashtimit të 23 deputetëve. Ne do të jemi në seance! 7×7 = 42 Paska qenë sëmundje ngjitëse!”, tha ai. /Sidorela Braçja