Sali Berisha u shpreh se kryeministri Edi Rama është i frikësuar dhe këtë e kuptoi herën e fundit që opozita ishte në parlament ku shënoi ditën e betejës pa kthim. Ai u shpreh se Rama asgjësoi opozitën pasi opozita në parlament nuk kishin asnjë kompetencë ligjbërëse.
Robert Rakipllari: SPAK-u sot është një institucion që shqiptarët kanë besim, është ngritur me 140 vota në parlament. Ka arrestuar zyrtarë të maxhorancës aktuale, të niveleve të larta. Shqipëria ka vuajtur nga pandëshkueshmëria. Nga vendet më të korruptuara. Drejtësia këtu nuk ka dënuar njeri.
Sali Berisha: Kush tha? Janë dënuar dy kryeministra.
Robert Rakipllari: SPAK deri tani ka goditur vetëm maxhorancën. Pse është i interesuar Rama që të procedoheni ju kur ju në zgjedhje ju mundi?
Sali Berisha: Morri fund ajo kohë. Ai e kuptoi që dita e fundit e opozitës në parlament shënoi ditën e betejës pa kthim. Për periudhën që udhëheq për shkak të veprimeve që kreu e asgjësoi opozitën defakto. Ne hynim në parlament njësoj si qytetarët e thjeshtë. Nuk kishim asnjë kompetencë ligjbërëse. Kemi dorëzuar 31 ligje dhe i mban Linda e parlamentit në sirtar.
Ndër të tjera i pyetur nëse mendon që akuzat e tij nga SPAK mund të jenë ndikuar nga SHBA, Berisha u shpreh që në qoftë se kjo është bërë për atë shkak ky është shërbimi më i keq që i kanë bërë pasi ai është shprehur që në momentin që do të dalin fakte ai do të largohet nga politika.
Blendi Fevziu: Ju akuzoni Ramën për çështjen tuaj. Ka shumë veta që thonë që Rama nuk ka kontroll mbi SPAK-un dhe e ka frikë vetë. A është kjo një kërkesë e SHBA?
Sali Berisha: Nuk e di. Në qoftë se kjo është bërë për atë shkak ky është shërbimi më i keq që i kanë bërë. Në momentin që të nxjerrin një fakt të vetëm të korrupsionit të Sali Berisha, Sali Berisha largohet nga politika. Me dosjen që nxorrën me hetim pas tre vitesh dhe nuk povuan asnjë akuzë ata më ndihmuan.