Kreu i SPAK, Altin Dumani, theksoi se institucioni që ai drejton ka vendosur nën hetim një ish-ministër, një ish-zv/ministër dhe gjashtë ish-kryetarë bashkie. Dumani publikoi rezultatet e arritura nga Struktura e Posaçme Kundër Krimit të Organizuar dhe Korrupsionit gjatë 9 muajve të vitit 2023, duke iu dërguar mesazh emrave “VIP” sikundër janë ish-ministrat Frida Krifca, Fatmir Mediu, Ilir Beqaj, Damian Gjiknuri, Arben Ahmetaj dhe ish-kryeministrit Sali Berisha, djalit të tij Shkëlzenit, dhëndrit Jamarbër Malltezi apo dhe kreut të partisë së Lirisë, Ilir Meta që janë me dosje në SPAK, se i presin ditët të vështira.
Po ashtu, ai evidentoi se ka një rritje prej 75 % të procedimeve penale lidhur me funksionarë të Policisë së Shtetit, “Nga 1/1/2023- 30/09/2023 janë regjistruar 151 procedime penale, me 133 persona nën hetim. Nga këto në total janë 13 procedime penale me 15 persona nën hetim, ish-funksionarë të lartë publik dhe ish-funksionarë të drejtësisë. Konkretisht nën hetim u vendosën 1 ish-ministër, 1 ish-zv/ministër, 6 ish-kryetarë bashkie, 2 ish-sekretarë të përgjithshëm, 3 ish-gjyqtarë dhe 1 ish-prokurorë. 4 prej tyre ish-funksionarë të drejtësisë, një prej tyre i shkarkuar nga Komisioni i Pavarur i Kualifikimit në kuadër të procesit të Vetingut. 7 procedime penale për ish-funksionarë të Policisë së Shtetit.
Numri i procedimeve penale ndaj ish-funksionarëve të Policisë së Shtetit u rrit me 75 % këtë vit, krahasuar me vitin e shkuar. Në gjykatë u dërguan me kërkesë për gjykim 24 procedime penale me 89 persona të pandehur, në të cilët: 6 procedime penale për 7 persona të pandehur të cilët janë ish-zyrtarë të lartë, 3 procedime për katër persona të pandehur të cilët janë funksionarë të Policisë. Numri i procedimeve ndaj ish-zyrtarëve të lartë u rrit me 20 % dhe të personave të pandehur 40 % më shumë se në krahasim me të njëjtën periudhë të vitit paraardhës”, u shpreh Dumani.