SPAK dhe policia operacion në disa qytete, arrestohet një zyrtar i policisë, shpallet në kërkim Gëzim Çela ish polic i kthyer në trafikant

Policia e shtetit në bashkëpunim me SPAK ka ndërmarrë një operacion në Tiranë, Krujë, Durrës, Vlorë e Kurbin. Mes personave për të cilët është lëshuar urdhër-arresti është dhe një zyrtar i lartë i Policisë.

Forca të shumta të policisë kanë rrethuar banesën e Gëzim Çelës, ish-punonjësi i policisë i konsideruar si një prej kokave më të mëdha të trafikut të kokainës dhe heroinës në Europë.

Mësohet se forcat e policisë kanë rrethuar banesën dhe lokalin e Çelës në Fushë-Kuqe, ndërsa operacioni po kryhet nga Policia e Shtetit në bashkëpunim me SPAK.

Raportohet se është kryer edhe arrestimi i një punonjësi të policisë, shef komisariati, ndërsa aksione paralele po zhvillohen edhe në Tiranë, Durrës, Vlorë, Kurbin.

Gëzim Çela akuzohet për veprat penale “Trafikimit i lëndëve narkotike”, të kryer në bashkëpunim dhe “Prodhim dhe mbajtje pa leje e armëve”, si dhe për shfrytëzim prostitucioni. Ai ka qenë më herët subjekt i “OFL”-së teksa ka mundur t’i shpëtojë drejtësisë.

Aktiviteti i Çelës ka nisur pak më herët se në vitin 2014 kur në bashkëpunim me persona nga Kosova kanë krijuar një rrjet të trafikimit të kokainës nga vendet e Amerikës Latine drejt Kosovës dhe Shqipërisë për ta shpërndarë më pas në të gjithë Europën dhe më tej.