Mauricio Poçetino po mendon të bëjë ndryshime në sulm të hënën në derbin kundër Fulhamit, por në konferencën e djeshme për shtyp nuk ka dhënë sinjale se Armando Broja do të jetë titullar, pavarësisht se Nikolas Xhekson do të mungojë i pezulluar.
Trajneri i Çelsit po i mban të hapura opsionet e tij, ndërsa la të kuptohej se sulmuesi senegalez mund të zëvendësohet nga Palmer, por nuk përjashtoi mundësinë për të luajtur edhe pa sulmues:
“Ne kemi disa opsione, të luajmë me një sulmues ose pa një sulmues. Gjithashtu ne duhet të vlerësojmë të gjithë skuadrën pas ndeshjes së të mërkurës. Gjërat shfaqen pas 48-orësh. Duhet të shohim se si janë dhe si do të rikuperohen nga lodhja e Brajtonit.
Gjëja më e rëndësishme është të përshtatemi me skuadrën dhe lojtarët që janë në dispozicion dhe të përpiqemi të gjejmë një mënyrë për të performuar. A mund të jetë Palmer titullar? Po, ndoshta. Jam shumë i kënaqur me paraqitjen e tij. Ai është përshtatur shumë mirë në skuadër. Sigurisht që ai është në mendjen time si një mundësi për të startuar të hënën”.
Armando Broja ka luajtur vetëm pak minuta në dy ndeshjet e fundit, kundër Aston Vilës dhe Brajtonit, ndërsa nuk është ende gati për të qenë titullar pas dëmtimit të rëndë në gju dhjetorin e shkuar. Por i pyetur nëse Poçetino do të hyjë në merkato për një sulmues të ri në janar, argjentinasi konfirmoi edhe njëherë besimin te shqiptari.
Ai kërkoi gjithashtu që t’i dëgjohet më shumë fjala nga pronarët në merkato: “Marrëdhëniet janë shumë të mira me pronarët dhe drejtorët sportivë. Unë duhet të jem më i përfshirë në merkato. Mendoj se ne duhet të fillojmë të identifikojmë se çfarë na nevojitet për janarin. Gjërat mund të ndryshojnë deri në janar.
Tani duhet të punojmë dhe të përpiqemi të rikuperojmë Nkunkun dhe sigurisht Armando Brojën dhe të përpiqemi t’i sigurojmë skuadrës më shumë gola, por edhe të jemi më solidë”.