Ilir Meta po kalon një situatë jo të mirë pasi ka mësuar se SPAK po shkon drejt përfundimit të hetimeve të dosjes së tij të “zezë” për korrupsion dhe falsifikim formularësh, pastrim parash, fshehje pasurie, mashtrim etj. Frika e tij pasqyrohet tek qëndrimet e tij ndaj drejtësisë së re. Meta e quan drejtësinë me regji. Sipas tij, fijet e SPAK i luan kryeministri Edi Rama.
Ish-presidenti, e ka cilësuar dje si një përpjekje e madhe propagandistike, operacionin “Tempulli”, të zhvilluar nga policia disa ditë më parë. Sipas tij operacioni shërbeu si mbulim për lajmin e arrestimit të Amant Josifit për llogari të drejtësisë spanjolle. ‘Pamë një operacion për disa orë të tëra për rreth 300 te arrestuar për shkak të angazhimit të tyre në trafikimin dhe shpërndarjen e drogës.
Ajo që ishte interesante nga ky operacion ishte fakti i një drejtësie me regji dhe një qeverisje me regji. Një përpjekje e madhe propagandistike, për të shmangur, arrestimin nga autoritetet spanjolle të një ish-këshilltari të ish-ministres së mbrojtjes dhe mik të vëllait të kryeministrit. Atë që së bëri shteti i kapur nga Edi Rama e bën autoritetet spanjolle, pasi atje ka vullnet për të goditur krimin e organizuar.
Kjo tregon se kush është i lidhur me kreun e qeverise gëzon anashkalimin e drejtësisë dhe institucioneve të së drejtës. Ndërsa qytetarët që nuk kanë mundur të paguajnë dritat, ndëshkohen me zell të zakonshëm , ashtu si ata 70 e ca vjeçarët që u ndaluan dhe akuzuan për shpërndarjen e drogës”, deklaroi Meta. Por këto akuza të ish-presidentit ndaj drejtësisë së re janë të pavlera, pasi SPAK ka nën hetim më shumë se gjysmën e qeverisë “Rama” dhe deri tani ka goditur nga kampi i majtë duke i arrestuar kryeministrit bashkëpunëtorët e tij më të rëndësishëm në PS.
Çfarë po ndodh me dosjen e pastrimit të parave?
SPAK mori nën hetim Ilir Metën për lobim në SHBA me vlerë 690 mijë USD, para këto të padeklaruara as në KQZ dhe as në ILDKP. Procedimi penal është regjistruar që në qershor 2022, pas kallëzimit të referuar nga ish deputeti Halit Valteri dhe tani dosja po shkon drejt përfundimit të hetimeve.
Në ditët në vijim priten fletë-arrestet. Në duart e hetuesve janë dy kontrata të LSI-së dhe Ilir Metës, me kompaninë McKeon Group në janar dhe qershor 2017, për t’i siguruar Metës takime dhe aktivitete në SHBA. Si ndërmjetëse është përdorur kompania “Dorelita Limited”, e regjistruar si offshore në Qipro, me administratorin e të cilës kishte lidhje Vangjel Tavo. Meta po hetohet për veprat penale të korrupsionit dhe falsifikimit të formularëve.
Lobimi 2 dhe fshehje pasurie
Gjithashtu, SPAK ka regjistruar një tjetër procedim penal, bazuar në një tjetër kallëzim penal të ish deputetit Halit Valteri. Pjesë e kallëzimit të dytë penal janë Presidenti Ilir Meta dhe kryetarja e LSI-së Monika Kryemadhi, deputeti Petrit Vasili, i ish ministri i Bujqësisë Edmond Panariti, kandidatja për deputete e LSI, Elona Guri, biznesmeni pranë LSI-së Muharrem Berisha, si dhe Iris Zajmi, Elena Gace, Jori Prifti dhe Agron Xhafa.
Në kallëzimin penal thuhet se këta persona, në bashkëpunim me njëri-tjetrin kanë krijuar një skemë të mirëfilltë të pastrimit të parave që rrjedhin nga korrupsioni dhe vjedhja e pasurive publike, ku në krye të kësaj skeme qëndron si zakonisht çifti Meta-Kryemadhi. Në kallëzim referohen kontrata të tjera lobimi në 2017 të padeklaruara si dhe ngrihen dyshim për fshehje pasurie, përfshirë edhe godinën e LSI-së. Procedimi penale është regjistruar për fshehje pasurie, korrupsion dhe pastrim parash.
Letërporositë
Për të provuar veprën penale të dyshuar, SPAK kërkoi informacion me letërporosi në SHBA. Autoritetet amerikane, në përgjigjen e kthyer, kanë konfirmuar pagesat e paligjshme për lobim. Kjo përgjigje fundos Ilir Metën dhe Monika Kryemadhin, të cilët duhet të zgjedhin se cili duhet të shkojë në burg. Kur SPAK mori në pyetje Ilir Metën, ky i fundit ia la përgjegjësinë Monika Kryemadhit, Petrit Vasilit dhe Endrit Braimllarit.
Gjithashtu SPAK pret përgjigje nga Austria dhe San Marino të cilat duhet të plotësojnë me informacion për ndërhyrjet estetike disa milionëshe të denoncuara nga avokati Idajet Beqiri për familjen Meta. Janë bashkuar disa kallëzime për Ilir Metën dhe të gjitha për pastrim parash. Pra zhvillimet në dosjen e tij të zezë që rrezikon veten, gruan e tij dhe të gjithë kupolën e LSI ka bërë që Ilir Meta të dalë jashtë kontrollit duke sulmuar ditë e fundit SPAK./Elmas Bogdani